Den nye Spire-leiaren vert stadig litt forbanna

– Spire er den tydelegaste stemma som ser klima, natur, utvikling, like rettar og økonomi i samanheng, skriv Julie Christina Rødje til Framtida på e-post.

26-åringen frå Haugesund vart vald til ny leiar i miljø- og utviklingsorganisasjonen Spire etter helgas stormøte.

Rødje har ei mastergrad i samfunnsgeografi og sit i samstemtheitsforumet til regjeringa. Ho kjem frå vervet som nestleiar i Spire og har tidlegare vore kampanjeleiar i organisasjonen ho no skal leia dei to neste åra.

Ho tek over etter Hege Skarrud, som vert ny leiar i Attac Norge.

• Les også: Miljøorganisasjonen Spire er skeptisk til miljømerking av mat

Trur ikkje på evig vekst

I tida framover vil Spire jobbe med å skape berekraftige og rettferdige matsystem, mot sentrum-periferi dimensjonen, mot maktkonsentrasjon og for klimatiltak, som ikkje råkar urettferdig.

Rødje peikar på korleis vi for tida står overfor altfor mange forsterkande krisar på ein gong. Ho meiner dagens økonomiske system på mange måtar har skapt dei utfordringane vi no står overfor.

– For å få til ei reell berekraftig utvikling og rettferdig fordeling, kan vi ikkje belaga oss på løysingar som grøn vekst og ein evig optimisme for teknologiske løysingar. Vi må forbruke mindre, men leve meir, slår ho fast, og legg til:

– Slik skapar vi eit samfunn som set menneske, velferd og natur i sentrum både i dag og i framtida.

Rettferd og klima

26-åringen starta sitt politiske engasjement i Operasjon Dagsverk og har seinare vore tilsett i Natur og Ungdom.

For Rødje er kampen mot urettferd den store hjartesaka:

– Etter kvart kom engasjementet for klimakrisa då dette på mange måtar var eit erkeeksempel på urettferd. Eg synest det er vanskeleg å nemne éi konkret sak, og vel difor å seie samstemt og heilskapleg politikk då ingenting gjer meg meir opprørt enn når nokon gir med ei hand, men tek minst like mykje tilbake med den andre.

– Kva er det som har gjort at du har engasjert deg?

– Eg trur kombinasjonen av å bli litt forbanna gjennom å stadig lære meir om kor urettferdig dagens politiske og økonomiske strukturar er, samstundes som ein får jobbe med fantastiske menneske, sjå at det vi gjer nyttar og at vi faktisk kan endre dei same problema, gir stadig ny giv.

Miljø- og bistandsorganisasjonen Spire peikar på korleis grøn overvekst ikkje kjem verdas fattige til gode. Illustrasjon: Spire

• Les også: Noreg aukar klimakuttmål: – Set press på resten av det internasjonale samfunnet

Reell ungdomsmedverknad

– Korleis kan ein sikra at barn og unge vert høyrde?

– Barn og unge skal arve jorda og samfunnet som i dag vert bygd. Samstundes skal ikkje unge bli reduserte til morgondagens vaksne. Unge sit på enormt mykje kunnskap, erfaringar, idèar og løysingar som vi er avhengige av for å skape eit betre samfunn, svarar ho, og utdjupar:

– Ungdomsmedverknad må ikkje bli redusert til eit punkt på ei sjekkliste, men det må anerkjennast at barn og unge er like forskjellige som vaksne. Ungdom skal difor ikkje berre bli høyrt, men bli anerkjent som samfunnsaktørar på like linje med resten av befolkninga, og delta i debattar og forhandlingar.

– Kva er idealsamfunnet?

– Eit samfunn der alle menneske har like rettar uavhengig av alder, kjønn, etnisitet, religion, seksuell legning, funksjonsevne, økonomi eller maktposisjon. Eit samfunn som set naturen og menneske si velferd, tryggleik og samhald i sentrum. Og kor vi handlar i solidaritet med medmenneske både på tvers av jorda og for komande generasjonar, og kor vi berre har litt betre tid til å ta vare på kvarandre og omgjevnadane våre.

• Les også: – Me er nøydde å tenkja på klima opp i dette, seier Natur og Ungdom-leiaren

Natur og Ungdom-leiar Therese Hugstmyr Woie meiner krisa me no står oppi viser kor oljeavhengig norsk økonomi faktisk er. Foto: Thor Due, Natur og Ungdom