Meir pop blant unge å leige friluftsutstyr

– Dette er ein stor internasjonal trend som for alvor er i ferd med å feste seg i Noreg. Det ser vi hos ei rekke av nettbutikkane våre. Dei unge ønskjer å leige, både fordi det kan vere smartare reint økonomisk, men dei ønskjer også å vere berekraftige samtidig som dei har det siste innanfor både mote og sportsutstyr, seier marknadsdirektør i Klarna Norge, Thomas Elvestad, i ei pressemelding.

Ifølgje undersøkinga som Klarna har fått utført, seier 23 prosent av dei spurde under 30 år at dei ønskjer å leige sports- og friluftsutstyr framfor å kjøpe det. For heile befolkninga sett under eitt uttrykkjer 14 prosent eit slikt ønske.

Les også: Friluftsliv er miljøversting: – Naturen har nærmast blitt eit moteshow

Bergans testar ut

Den norske utstyrsleverandøren Bergans testar utleige av både parkdressar, telt, klede og anna friluftsutstyr og trur at denne trenden vil vekse seg sterkare.

­– Då vi la ut ein Facebook-post for å få familiar til å delta i eit pilotprosjekt for abonnement på parkdressar, fekk vi meir enn 2.000 meldingar. Vi har også hatt ein del interesse for leige av teltutstyr, ryggsekker, klede og sko som vi tilbyr i flaggskipbutikkane våre i Oslo og Tromsø. Å leige i staden for å eige er ein heilt klar trend innanfor vår kategori, seier berekraftsansvarleg i Bergans Yngvill Ofstad.

Ifølgje Klarnas undersøking ønskjer også 10 prosent av alle under 30 år å leige klede og mote framfor å kjøpe det. Det tilsvarande talet blant alle nordmenn er fem prosent.

Les om korleis Houdini og Bergans jobbar med å utvikla nye forretningsmodellar: – Fleire og fleire innser at dei ikkje treng å eige

Berekraftansvarleg i Bergans, Yngvill Ofstad, trur på sirkulære forretningsmodellar og vil få opp volumet på utleigedelen av verksemda. Foto: Esmod i Oslo