Dette er dei norske gamerane som tente mest i 2019

Ingvild Eide Leirfall
Publisert 09.01.2020 13:01
Oppdatert 15.04.2020 11:04

Denne artikkelen er eldre enn 1 år gamal. Det betyr at noko av informasjonen kan vere utdatert.

Ifølgje esportearnings.com er det fleire nordmenn som har hatt eit godt år innanfor internasjonal e-sport. Noreg ligg på 14. plass med ei inntening på 30,3 millionar kroner fordelt på 174 spelarar.

Lista viser prispengar tent på e-sport i 2019 basert på offentleg tilgjengeleg informasjon.

Det var gamer.no som først omtala dette.

16-åring vann 13 millionar

Øvst på lista ligg den 16 år gamle Fortnite-spelaren Emil B. Pedersen. Han har 13 millionar i inntening, både i år og totalt.

På topplista over norske spelarar si inntening nokosinne er det berre gutar og menn, og første kvinne kjem ikkje før på 106. plass. Det er Anette Skarderud (35) med nicket «Cazzidy», som har henta heim omlag 50.000 kroner med å spela Counter-Strike.

I 2019 var «Katja» på 68. plass med 9700 kroner, på spelet Rainbow Six Siege Player.

Les også: Dette må til for å bli god i e-sport

1. Nyhrox (16)

Emil «Nyhrox» Bergquist Pedersen. Foto: Gamepedia

Namn : Emil Bergquist Pedersen
Inntening (2019): 13,4 millionar kroner
Spel: Fortnite
Premiepengar totalt – Verdsranking: 52
Premiepengar totalt – Noregsranking: 1
Talet på turneringar totalt: 13

2019 vart eit suksess-år for 16-åringen frå Re i Vestfold og Telemark. I juli vann han VM i Fortnite, saman med makkar David «Aqua» Wang frå Austerrike. Dei vann 3 millionar dollar, delte premien på to og endte opp med omlag 13 millionar norske kroner kvar.

– Det er som å vinne i lotto på ein god dag. Det er heilt ekstremt. Det er ein av dei største prestasjonane i norsk E-sport, sa e-sportekspert i NRK, Vegard Lien, då.

2. Aitzy (21)

Ludvik «Aitzy» Jahnsen. Foto: Gamepedia

Namn: Ludvik Jahnsen
Inntening (2019): 2,45 millionar kroner
Spel: Playerunknown’s Battlegrounds
Premiepengar totalt – Verdsranking: 409
Premiepengar totalt – Noregsranking: 5
Talet på turneringar totalt: 16

Saman med FaZe Clan har Jahnsen hatt eit godt år. FaZe Clan er etter 2019 det nest beste laget i verda i PlayerUnknown’s Battlegrounds (PUBG), etter dei kom på andreplass i PUBG Global Championship-finala i november.

3. Hunterace (18)

Casper «Hunterace» Notto. Foto: Liquipedia.net

Namn: Casper Notto
Inntening i 2019: 2,38 millionar kroner
Spel: Hearthstone
Premiepengar totalt – verdsranking: 394
Premiepengar totalt – Noregsranking: 4
Talet på turneringar totalt: 25

18-åringen er verdas beste Heartstone-spelar etter at han vann VM i 2019. Der var potten på 2,2 millionar kroner.

– Pengane er ikkje så viktig for meg. Det følest stort å oppnå noko eg har jobba utruleg hardt for og eg er takksam for at eg får driva med det eg elskar, pengane kjem etter, sa han til VG.