670.000 har lasta ned førarkort-appen
Statens vegvesen opplever stor interesse for det digitale førarkortet. Det første døgnet har 670.000 brukarar lasta ned den nye appen for lappen.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Vi visste at dette kom til å bli populært, men interessa og trafikken overgår det meste. Vi er glade for at folk set pris på tenesta, seier direktør Bodil Rønning Dreyer i Statens vegvesen.
Den eldste brukaren av tenesta er 95 år. Det er totalt 10 personar over 90 år som har lasta ned appen, ifølgje Vegvesenet.
Les også: Førarkortet blir digitalt – men berre i Noreg
Noreg er først i Europa
2,2 millionar førarkort-innehavarar kan bruke det nye digitale førarkortet. Nokon får ikkje tatt i bruk appen fordi at det ikkje ligg eit digitalt bilde i Vegvesenet sitt system.
Fleire land utviklar digitale førarkort, men Noreg er truleg det første landet i Europa som rullar ut løysinga i full skala, opplyser Statens vegvesen.
– Vi ønsker å gjere det enklare for folk å bruke Vegvesenets tenester. Vi har brukartenester og digitale tenester innan mange område. No òg på førarkort, seier Dreyer.
App er gyldig dokumentasjon
Det digitale førarkortet er gyldig dokumentasjon på førarrettane dine. Du treng ikkje å ha med plastkortet i tillegg. Det digitale førarkortet er førebels berre gyldig i Noreg og som legitimasjon dersom du blir stoppa i trafikkontroll.
Digitalt førarkort kan berre bli nytta på éin telefon om gongen. For iPhone må du ha iOS-versjon 9.0 eller nyare, medan Android-brukarar må ha versjon 6.0 eller nyare.
