Nyhende- og debattavisa for unge
Denne artikkelen er eldre enn 1 år gamal. Det betyr at noko av informasjonen kan vere utdatert.
Neste helg brakar det laus på øya Giske utanfor Ålesund med den årlege Sommarfesten på Giske. Nytt av året: Du kan betale inngangsbilletten med plast!
Kravet er at plasten skal vere plukka i naturen eller på stranda, det nyttar ikkje å ta med plastbosset frå heimen.
– Dei fleste festivalar, også våre, har ein veg å gå for å drive mest mogleg berekraftig, men i år tek vi nye steg i riktig retning, seier festivalsjef Ante Giskeødegård i ei pressemelding.
Det var NRK som først omtalte saka.
Laurdag kan festivaldeltakarane såleis legge inn ein innsats for miljøet, og i døra betale med ein søppelsekk plast i staden for ein femhundrelapp. Søndag plar Sommarfesten ha eit spleiselag – ein betalar den summen ein vil, eller tek med ei kake til eit felles kakebord. I år kan spleisekassebidraget også vere ein haug strandplast.
Senjamusikaren Moddi rosar Sommarfesten for å vise at festivalar kan handle om meir enn musikk. Pressefoto: Jørgen Nordby
Laurdag står artisten Moddi på scena for tredje gong. Han rosar Sommarfesten for å ta samfunnsansvar:
– Eg veit at for kvar einaste drit som vi hentar ut av fjøra, så har verda blitt ein litt betre stad, seier han til NRK.
Lurer du på korleis du kan leve meir klimavenleg i kvardagen? Her får du nokre tips.
Sommarfesten på Giske skryt av å vere den første festivalen i verda som aksepterer plast i staden for pengar.
I pressemeldinga opplyser festivalen om at den innsamla plasten vert brukt til ein kunstinstallasjon på festivalområdet, før den så skal resirkulerast.
– Plast i havet er eit stort problem, og det er viktig for oss å ta ansvar, seier Giskeødegård.
Festivalsjefen seier dei i tillegg til å akseptere plast som betaling innfører konkrete tiltak for å redusere bruken av plast på festivalen og for å rydde området.
Prosjektet «Spleis med plast» er i samarbeid med Sparebanken Møre og Plastfritt Hav.
Les også: Nær 3 av 4 er bekymra for plastinnverknad på miljøet
