Ein kinesisk romsonde har landa på ein tidlegare uutforska del av månen
Denne artikkelen er eldre enn 1 år gamal. Det betyr at noko av informasjonen kan vere utdatert.
Natt til torsdag norsk tid, landa den kinesiske romsonden Chang’e-4 på den sida av månen som vender vekk frå jorda.
Det melder den statlege TV-kanalen CCTV.
Månen roterer rundt si eiga akse på ein slik måte at det alltid er same sida av overflata som vender mot jorda. No er omsider det første bilete av den mørklagte, og uutforska delen av månen tilgjengeleg.
#China‘s Chang’e-4 probe sends back world’s first close shot of moon’s far side after historic soft landing on uncharted area https://t.co/OckokVjnh8 pic.twitter.com/ReORkkPcq3
— CGTN (@CGTNOfficial) 3. januar 2019
Utfordrar NASA
Forskningssjefen i Norsk Romsenter, Terje Wahl, uttrykker si begeistring til VG:
– Dette er jo ei romfartshistorisk hending reint teknisk fordi dei har gjort noko som ingen andre har gjort før.
Han seier vidare at den kinesiske romfarten no utfordrar det amerikanske romfartsbyrået NASA om å vere dei som gjer mest og kan mest om verdsrommet, med sitt omfattande romprogram.
Chang’e-4 skal etter planen utføre fleire eksperiment på den fjerne sida av månen, mellom anna av det store krateret Von Kármán. Etter at romsonden vart skoten opp tidleg i desember skreiv NRK at Chang’e-4 mellom anna har med seg frø frå plantar og egg frå insekt, og at kinesarane vil undersøke kor vidt desse kan spire og gro saman i den låge tyngdekrafta på månen.
Her kan du sjå ein video om den historiske landinga:
Video: #China‘s Chang’e-4 makes historic landing on moon’s far side https://t.co/OckokVjnh8 pic.twitter.com/x3YferTF1o
— CGTN (@CGTNOfficial) 3. januar 2019
