Oljenæringa treng over 1.000 nye folk
Denne artikkelen er eldre enn 1 år gamal. Det betyr at noko av informasjonen kan vere utdatert.
Behovet for nye folk i året som kjem, er størst på ingeniørsida, ifølgje undersøkinga bransjeorganisasjonen har gjennomført.
– Olje- og gassindustrien står framfor spennande utfordringar. Vi har ambisjon om å liggje blant dei fremste i verda i bruk av digitale løysingar. Mange oppgåver skal automatiserast. Dette er spennande faglege utfordringar, seier administrerande direktør Karl Eirik Schjøtt-Pedersen i Norsk olje og gass.
Skal ta i bruk ny teknologi
Rundspørjinga er gjort i samband med årskonferansen til organisasjonen, som startar i Oslo torsdag. Bransjen har vore gjennom nokre krevjande år med fallande oljeprisar. Kostnadskutt har bidratt til at det er mogleg å gjennomføre prosjekt til lågare pris, noko som har ført til auka aktivitet, ifølgje organisasjonen.
– Denne industrien blir driven framover av kompetanse. No står vi framfor ei ny tid der vi skal ta i bruk ny teknologi og samtidig løfte næringa inn i lågutslepp-samfunnet. Då treng vi dei klokaste hovuda, og dei mest motiverte ungdommane, seier Schjøtt-Pedersen.
Trass i optimismen i undersøkinga, er ikkje bildet eintydig positivt for alle, og Norsk olje og gass påpeikar at bemanningsbehovet varierer frå bedrift til bedrift.
- Les også: Fleire vel klima framfor olje
