Ada Arnstad: – Vi må bruka makta vår i Stortinget
Denne artikkelen er eldre enn 1 år gamal. Det betyr at noko av informasjonen kan vere utdatert.
– Kva har gledd deg mest i 2017?
– Politisk så er den største gleda at over 300.000 menneske røysta på Senterpartiet og samfunnsretninga vår i valet. Det er litt av eit arbeidsoppdrag vi har fått på deira vegne og eg gleder meg til å jobba for dei.
– Den største gleda personleg er at eg har blitt tante for første gong. Utruleg stas!
– Kva har skuffa deg mest i 2017?
– Eg er veldig skuffa over at valkampen i så stor grad vart prega av spel, einskildpersonar og meiningsmålingar i staden for politiske saker. Vi ynskjer at fleire skal engasjera seg i demokratiet og bruka røysteretten sin, eg fryktar at valkampar som den i år verkar mot det formålet.
– Kva er det største ønskjet ditt for 2018?
– Det største ønsket mitt er at vi i Senterungdomen får eit år med mykje politikkutvikling, aktivitet og trivsel. Vi skal få fleire med på laget og få endå betre politikk for utvikling og gode mulegheiter i heile Noreg.
– Kva er framtida for samarbeid mellom sentrumspartia, etter at Venstre no går i regjeringsforhandlingar åleine?
– Det er klart at det markerer eit nytt kapittel i sentrumshistoria når Venstre vel samarbeid med Frp. Eg håpar og trur at me enno kan samlast om gode sentrumssaker i Stortinget, sjølv om Venstre går i regjering.
– Kva meiner du skal til for at dei raud-grøne skal få fleirtal igjen?
– Gjennom fleire saker som nyleg har vore i Stortinget ser vi skissa av kva eit raudgrønt samarbeid tyder. Til dømes den auka fedrekvoten, endringa for pleiepengeordninga, stopp i kommunetvang og revurdering for oktoberborna. Vi må bruka makta i Stortinget for gjennomslag når Noreg har ei mindretalsregjering, og vera gode på å visa kva for eit samfunn vi ynskjer og arbeider for.
– Kva bok vil du anbefala andre å lesa i romjula?
– Eg vil tilrå Frokost med Thorvald, som byggjer på sju samtalar med Thorvald Stoltenberg. Veldig god bok om livet, politikken og verdssamfunnet.
