Luftforureining krev millionar av liv årleg
Utandørs luftforureining krev rundt 3,3 millionar liv kvart år, ifølgje ein ny, tysk studie.
Denne artikkelen er eldre enn 1 år gamal. Det betyr at noko av informasjonen kan vere utdatert.
Så mange døyr av dårleg luft
Dei fleste av dei ramma, nærare 75 prosent, døydde av slag og hjarteinfarkt løyst ut av å puste inn forureina luft over lengre tid.
Resten fekk luftvegssjukdommar eller lungekreft etter å ha pusta inn støvpartiklar utandørs over lengre tid, viser studien, som er publisert i forskingstidsskriftet Nature.
Ulmande bål til matlaging og varme i India og Kina utgjer den største enkeltårsaka til luftforureininga. Vidare er blant anna trafikk i USA og bruk av kunstgjødsel i Russland andre store syndarar.
– Dersom ein skal unngå desse aukande tidlegdødsfalla grunna luftforureining, må ein innføre sterke kontrollmekanismar, særleg i Sør- og Aust-Asia, seier forskar Jos Lelieveld frå Max Planck-instituttet for kjemi i Tyskland.
Dei nye tala støttar funna i ein rapport frå Verdshelseorganisasjonen frå 2014, som også kom til eit liknande tal. (©NPK)
