Disiplinert arbeidsveke
– Sjølv om det var ei hard veke, freistar det no å arbeide i Forsvaret i framtida.
Denne artikkelen er eldre enn 1 år gamal. Det betyr at noko av informasjonen kan vere utdatert.
Dette fortalde Marcus Lunde og fleire av dei andre elevane frå Ørsta ungdomsskule som var på militærleir i Åndalsnes førre veke. Fem gutar frå 9. klasse hadde nemleg den årlege arbeidsveka si der!
Disiplin i leiren
Det var Møre og Fjordane Heimevernsdistrikt 11 som inviterte dei til dette, der også elevar frå ungdomsskulen i Bergmo, Spjelkavik og Åndalsnes tok del. Til saman var det i underkant 30 elevar som fullførte arbeidsveka si der.
Eit tett og krevjande program var sett opp desse fem dagane, der dei på skikkeleg vis fekk oppleve korleis det er å vere i militæret. Dei budde i firemannsrom i brakker, og elevane frå ØUS måtte dele rom med andre elevar dei ikkje kjende. Kvar morgon klokka ti på åtte måtte dei stå klare til oppstilling i uniform, og romma deira måtte vere strøkne og godkjende av sersjanten.
– Og var nokon forseinka til oppstilling måtte alle som var tidsnok stå i planken som straff, medan straffa til dei som var forseinka var å sjå på at alle andre fekk straff på grunn av dei, forklarar Gard Rekkedal.
Også om nokon forsynte seg av dessert etter å ha kasta restar frå middagstallerkenen sin kunne dei verte straffa.
– Då kunne vi alle ende opp i planken igjen, seier Robin Olai Sætre Follestad.
Disiplin var med andre ord det som sette størst spor etter denne veka. All uønskt åtferd vart straffa; der ordbruk, rydding, vasking i leiren, og å vere i tide og sjå presentabel ut under øvingar og anna program var påkrevd. Dei fekk heller ikkje lov til å bruke mobilen anna enn på fritida.
– Å ikkje få bruke den var eigentleg heilt greitt for vi var så opptekne uansett. Eg var førebudd på at dei skulle vere enda litt strengare, seier Arthur Gulla.
Utfordringar gav meirsmak
Det mest utfordrande dei var med på var mellom anna speed-marsjen. Her måtte dei gå fort i 50 minutt med sekk på ryggen som vog rundt 20 kg. Deretter fekk dei berre ti minutt pause før neste etappe byrja.
– Ja, dette var hardt! Militærstøvlane var tunge, og mange fekk gnagsår. Andre kjende seg dehydrert, fortel karane.
Ein annan morgon vart dei vekte klokka halv fem og fekk berre ti minutt på seg til å stå klare. I nær to timar vart dei utfordra gjennom mellom anna å bere kanner med vatn eller ein person på båre for å kjenne på kroppen korleis det ville verte å bere tungt lass eller ein skada person. Etter dette hadde dei styrketrening før dei omsider fekk servert frukost.
Dei var glad for at dei sjølve var sikre på valet med å reise til leiren i arbeidsveka, for dei fekk inntrykk av at somme frå andre skular ikkje heilt hadde motivasjonen med seg, noko som gjorde at dei ikkje fullførte veka og reiste heim.
Trass i all den fysiske påkjenninga dei måtte gjennomgå, var dei svært tilfreds med arbeidsveka. Det aller kjekkaste dei fekk bryne seg på var dei alle samde om: å få skyte på blink med AG-3 gevær som vog nær fem kilo.
Under opphaldet fekk elevane frå ØUS også god innføring i kva moglegheit dei har for utdanning i forsvaret i framtida. Fleire syntest dette var interessant, sjølv om dei såg på dei ulike testane etter førstegongstenesta som utfordrande.
Elevane vil på alle måtar anbefale andre som skal ha arbeidsveke seinare om å takke ja til militærleir om dei har motivasjonen med seg og om skulen er så heldig å bli invitert igjen.
