Fredag er siste dag i Forsvaret for prinsesse Ingrid Alexandra

Prinsesse Ingrid Alexandras siste dag av verneplikta ved Ingeniørbataljonen i Brigade Nord på Skjold leir i Indre Troms, er fredag denne veka.

Det stadfestar Slottet til NTB.

I dag kjem far hennar, kronprins Haakon, til Skjold leir for å inspisere bataljonen.

Før kronprinsen kjem til leiren blir det høgtideleg oppstilling og utdeling av vernedyktigheitsmedalje av bataljonssjef Bjørn Kråkstad, opplyser Slottet.

Kronprinsen skal inspisere ingeniørbataljonen klokka 12.05, før han klokka 13 et lunsj med prinsesse Ingrid Alexandras medsoldatar. Klokka 14 er det materielldemonstrasjon av kapasitetar i ingeniørbataljonen

Forlengde førstegongstenesta

21 år gamle prinsesse Ingrid Alexandra starta førstegongstenesta si i januar i fjor. Førstegongstenesta skulle eigentleg vare eitt år, men i september i fjor opplyste Forsvaret at prinsessa hadde forlengt førstegongstenesta til 15 månader, og at ho dermed skulle dimittere i april i år.

Ho har teke fagutdanninga si som ingeniørsoldat i Brigade Nord i Hæren, med tenestestilling som skyttar på stridskøyretøyet CV90 RWS STING, som er ei stormingeniørvogn i eit pansra ingeniørkompani

Då prinsesse Ingrid Alexandra møtte pressa i september og sa ho ville forlengje tenesta, sa prinsessa at ho treivst veldig godt, med ein spennande og variert kvardag. Ikkje minst trekte ho fram samhaldet og fellesskapen i kompaniet som viktig for trivselen.

– Eg har vorte utfordra mange gonger sidan eg kom inn. Eg trur det viktigaste eg har lært, er at ein kan mykje meir enn ein trur, og ein er mykje sterkare saman. Om det er i lag eller i tropp eller kompani får ein til mykje meir når ein ikkje står åleine, sa ho.

– Eg har lært utruleg mykje, sidan eg kom inn. Det er jo både fysisk og psykisk slitsamt, men ein lærer at ein får til det meste saman, sa ho til NTB.

Fekk medalje og bunad

NRK melde torsdag førre veke at Ingrid Alexandra same dag vart tildelt Brigadeveteranforbundets heidersteikn. Det er ei utmerking som blir delt ut av Brigadeveteranforbundet. Det er den høgaste utmerkinga til forbundet, og heidrar kvinner og menn som har vist forbundet særleg interesse, eller som har ytt framifrå arbeid som fremjar formålet med forbundet.

Tysdag fekk prinsessa ein Bardu- og Målselvbunad i gåve frå det lokale husflidslaget i Målselv, der Skjold leir ligg, i samband med dimitteringa.

Det er førebels ikkje kjent kva prinsessa skal gjere når ho er ferdig i Forsvaret.