Lanserer sju nye sosiale klassar

Deler samfunnet inn i sju klassar

Britane passar ikkje lenger inn i dei tradisjonelle kategoriane overklasse, middelklasse og arbeidarklasse. Arbeidarklassen er no berre éin av sju sosiale klassar og er i ferd med å forsvinne, viser ein ny britisk studie.

Den fremste klassen, dei rikaste, kallar forskarane no eliten. For å høyre til der, må du ha ein formue på minst 1,2 millionar kroner, utdanning frå eit toppuniversitet og ein vid sosial omgangskrets – på fagspråket høg økonomisk, kulturell og sosial kapital.

Proletariatet, arbeidarklassen, har no fått nokon under seg, nemleg «prekæriatet», dei mest ressurssvake.

Den nye underklassen utgjer ein så stor del som 15 prosent av dei vel 160.000 personane som har vore med i undersøkinga. På den andre sida kan om lag 6 prosent av britane definere seg som elite.

– Identifiseringa av desse ytterklassane, viser oss at dei konvensjonelle tilnærmingsmåtane har hindra oss i å sjå desse to ekstrema, som er så tydelege i det britiske samfunnslivet, seier professor Mike Savage ved London School of Economics and Political Science (LSE), som har gjort studien saman med professor Fiona Devine ved University of Manchester, til avisa The Independent.

LES OGSÅ: Trur på fleire opptøyar

Mellom dei mest velståande og mest ressurssvake har Savage og Devine splitta opp den tradisjonelle inndelinga i to typar middelklasse og tre variantar av arbeidarklasse. Den tradisjonelle arbeidarklassen er i ferd med å forsvinne og utgjer no berre 14 prosent av befolkninga i Storbritannia, viser studien.

Den største gruppa er likevel den etablerte middelklassen, som er ressurssterk, men ikkje heilt i rikingklassen. Kvar fjerde brite høyrer til der. (©NPK)