Her er landets første mobbeombod
10.000 elevar i Buskerud får sitt eige mobbeombod. – Elevane skal oppleva ein skulekvardag utan mobbing og krenkingar, seier Bodil J. Houg.
Denne artikkelen er eldre enn 1 år gamal. Det betyr at noko av informasjonen kan vere utdatert.
Landets første
Buskerud er det første fylket i landet som får eit eige mobbeombod.
– Eg gler meg veldig, men er audmjuk for oppgåva. Eg veit det gjerast mykje godt arbeid i skulane i Buskerud allereie, og eg ser fram til å starte, seier Bodil J. Houg, nytilsett mobbeombod i Buskerud fylkeskommune.
– Me gler oss og er spente på korleis mobbeombodet vil fungere i praksis, seier dei tre elevane Øyvind Normann, Mari Arnesen og Truls Sætrang til fylkeskommunen sine eigne nettsider.
– Altfor mange elevar får skulegangen sin øydelagt på grunn av mobbing, difor er vi glade for at fylkeskommunen tek ansvar og tør å gå der ingen før har gått, seier dei tre elevane.
LES OGSÅ: Vil stengje mobbeskular
Førebyggjande arbeid
Det nye ombodet er tilsett i ein prosjektperiode på to år. Ho startar i jobben 1. januar 2013 og fòr kontor i fylkeshuset i Drammen.
Ombodet skal både arbeide førebyggjande, bidra med kompetanse på området, følgje opp arbeida til skulane med handlingsplanar mot mobbing og bidra i saker som ikkje lèt seg løyse lokalt.
LES OGSÅ: Felles kamp mot mobbing
Forslag frå KrF
Mobbeombodet skal det vera eit lågterskeltilbod der det skal vera enkelt å ta kontakt.
Kristian Hammervik (KrF), som er medlem i hovudutvalet for kultur, idrett og folkehelse i fylkeskommunen, kom med forslaget om å opprette eit mobbeombod.
– Kampen mot mobbing er folkehelse av beste sort. Eg er overtydd om at me treng ein ressurs som eit mobbeombod i kvart fylke, og eg er veldig stolt over at me har fått til dette i Buskerud, seier Hammervik.
LES OGSÅ: Like mange blir mobba
