No får du rett ordliste på nett
Den nye rettskrivinga for nynorsk er no lagd inn i nettutgåva av Nynorskordboka.
Denne artikkelen er eldre enn 1 år gamal. Det betyr at noko av informasjonen kan vere utdatert.
1. august fekk me nye reglar for rettskriving i nynorsk. Men som Framtida.no melde då fanst det ikkje oppdaterte ordlister på nett då endringa skjedde. No har Språkrådet og Universitetet i Oslo endeleg fått det på plass.
Oppslagsord og bøyingar er oppdaterte i samsvar med ny rettskriving. Dermed er det slutt på klammeformer i både oppslagsord eller bøyingsformer.
– Nynorskordboka er open for alle og viser kva som er rett nynorsk frå no av, seier direktør Arnfinn Muruvik Vonen i Språkrådet i ei pressemelding.
Ordboka er oppdatert av Universitetet i Oslo i samarbeid med Språkrådet.
Den nye utgåva har ikkje berre ny rettskriving, innhaldet er òg presentert betre enn før. No har ordboka:
– bøying for alle ord, også samansetningar
– mindre bruk av forkortingar enn før, alle oppslagsorda er skrivne fullt ut, også i døma
– mange klikkbare ord i definisjonane
Bokmålsordboka skal fornyast på liknande vis som Nynorskordboka.
Søk i ordboka frå Startsida.no (i den tredje søkjeboksen på høgre side) eller direkte på www.nob-ordbok.uio.no!
