Kystverket vil ha ta bil-lappen frå båtsyndarar
Dersom ein mistar båtførarbeviset på grunn av promille, burde ein også miste retten til å køyre bil, meiner regiondirektør Harald Tronstad i Kystverket.
Denne artikkelen er eldre enn 1 år gamal. Det betyr at noko av informasjonen kan vere utdatert.
Vil ta lappen
Regiondirektøren i Kystverket Midt-Noreg seier til NRK at det er på høg tid med ei regelendring for å redusere talet på promillerelaterte båtulukker på sjøen. Regiondirektøren vil gå drastisk til verks.
– Ein burde kople båtkøyringa til bilkøyring: Dersom ein køyrer i fylla med båt, så bør ein også miste retten til å køyre bil, seier Tronstad.
Regiondirektøren meiner det ikkje er tvil om at eit strengare regelverk vil vise seg gjennom færre båtulukker i Noreg.
– Det vil endre haldningane folk har til promille. Når me ser kor mange ulukker som skjer langs kysten, må ein finne på noko som har effekt for å få ned dødsulukkene. Med den farten som enkelte båtar har i dag, så trur eg grensa må ned også på sjøen, seier Tronstad.
I dag er det lov å ha 0,8 i promille ved båtkøyring, medan grensa er 0,2 på vegen.
Det er båtulukkene som dominerer drukningstala så langt i år. Rundt tretti personar dør i ulukker med fritidsbåt kvart år, og berre dei to siste dagane har det vore to ulukker med dødsfall. (©NPK)
KVA TRUR DU MÅ TIL FOR Å FÅ NED TALET PÅ BÅTULUKKER? BRUK KOMMENTARFELTET OG SEI MEININGA DI!
