Vil flytta statsjobbar ut av Oslo
Denne artikkelen er eldre enn 1 år gamal. Det betyr at noko av informasjonen kan vere utdatert.
Vil flytta jobbar i staten ut av Oslo
Dette viser ei undersøking av Sentio på oppdrag for avisa Nationen. I distrikta er det heile 75,9 prosent som vil flytta fleire statlege arbeidsplassar ut av Oslo-gryta.
Sidan 2005 har 600 statlege arbeidsplassar blitt flytta eller vedtatt flytta. Dette er berre tiandeparten så mange som landsmøtet til Senterpartiet i 2005 ønskte å flytta.
Rekordstor Oslo-vekst
Samstundes har det vore ein stor auke i statlege arbeidsplassar i sentrale strok. Alle dei store byane i Noreg har opplevd ein stor folkevekst dei siste ti åra. I Oslo auka folketalet med 2,1 prosent i løpet av 2010. Ingen andre storbyområde i Europa kan visa til større prosentvis vekst i folketalet.
I Stavanger var talet 1,8 prosent, medan det er noko lågare i Bergen og Trondheim.
Treng tøffare politikk
– Me må jobba for få ein tøffare politikk på området. Me ser at lokalisering av arbeidsplassar og kompetanse er viktig i forhold til å skapa vekst og utvikling rundt omkring, seier kommunalminister Liv Signe Navarsete (Sp) til Nationen.
Rett under 40 prosent av dei spurte i Oslo har lyst til å flytta statlege arbeidsplassar ut av hovudstaden.
Kva meiner du? Bør staten flytta fleire arbeidsplassar ut av Oslo?
