Storegutprisen er ei påskjønning til nokon som på ein positiv måte nyttar eit levande og ledig nynorsk i det offentlege rom. Under Litteraturdagane i Vinje i helga var det laurdag festkveld i Edland med utdeling av årets Storegutpris.
Odd Nordstoga, ein av dei store musikarane i Noreg, har i årevis servert tekstar på vinjemål. Artisten har klart å få med svært mange i Noreg til å syngje med på nynorsk og dialekt.
– Det er ei stor ære å dele ut Storegutprisen til Odd Nordstoga, sa Sondre Bratland på ein godt besøkt festkveld i Storegutsalen i Edland.
Halde på nynorsken
Ein blid Nordstoga spratt opp på scena for å ta imot blomar og ein bronseskulptur av Storegut.
– Eg kan ikkje klage på at eg ikkje er prispåskjønna før. Men det er noko heilt eige å få ein pris av eigen kulturkrins, og som har greie på det og set høge krav, sa Nordstoga etter overrekkinga.
Han syntest det var veldig stort og flott å få Storegutprisen. Nordstoga ser det som viktig å vere ein representant for nynorsken, og seier det er svært når andre set pris på det.
Nordstoga bur i Oslo. I det daglege arbeidsmiljøet er han aleine om å bruke vinjemål.
– Eg prøvar å vere god til å halde på språket, men det er ikkje så lett. Hadde eg vore heilt ute, hadde eg vel ikkje fått Storegutprisen, seier Nordstoga til VTB.
Etter å ha gjeve ut debutalbumet «Something Odd» i 1997, følte Nordstoga at det einaste folk merka var at han song på dialekt.
– Slik er det ikkje lenger, slår vinjekapasiteten fast med eit smil.
Festkvelden laurdag blei ein stor dag for han.
– Ein blir liksom godtatt av sine eigne, avsluttar Nordstoga, den populære nynorsksongaren som er klar med ny plate 2. oktober.
