Lanserer ti bod for betre integrering

Vil forby niqab og delte symjetimar

– Noko av det viktigaste me føreslår er fleire tiltak for å få folk i jobb, seier Sveinung Rotevatn (V) til Framtida.no.

Han har vore med i utvalet til Tankesmien Agenda saman med fleire andre sentrale folk frå sentrum og venstre i politikken og fleire leiande forskarar.

– Flyktningar som mest sannsynleg får opphald i Noreg, må få arbeidstillating tidlegare, slik at dei kan få høve til å jobba, seier Rotevatn (bildet). Han seier han reknar med at regjeringa kan vera skeptisk til dette, sidan nokon kan hevda at dette kan vera med å dra folk til Noreg.

– Me vil difor reservera dette til dei som mest sannsynleg vil få opphald i Noreg, som til dømes folk frå Syria. Det verste som kan skje, er at dei har bidrege til samfunnet medan dei har vore her.

Utvalet ønskjer òg å bruka lønnstilskot meir for å få flyktningane ut i arbeid.

LES OGSÅ: – Å jobba frivillig er den beste måten å bli integrert på

Vil forby nikab og kjønnsdelt svømming
Sveinung Rotevatn er tidlegare kjent for å leggja fram ei liste over forbod han vil fjerna. I dag stiller han seg bak å forby bruk av niqab i skulen, i offentleg sektor og i kontakt med offentlege organ.

– Det er ein krevjande debatt. Men eg meiner at full forkledning er med på å hindra mellommenneskeleg kontakt.

Han stiller seg òg bak eit forbod mot kjønnsdelt symjeundervising.

Utvalet føreslår elles blant anna:

– å styrka deltakinga i frivillige organisasjonar heilt frå starten når flyktningane kjem til Noreg.

– ei meir aktiv formidling av felles verdiar, som likestilling, ytringsfridom, solidaritet, vitskapeleg tenkemåte via barnehagar, skular og integreringsprogram

– desentralisering av UDI og raskare behandling av asylsøknader

LES OGSÅ: – Dagens asylsystem lokkar folk i dødsfeller