«Trumps tollproteksjonisme er ein trussel mot norsk næringsliv»
I ei tid med uro i verda er det viktigare enn nokon gong at vi har trygge og stabile rammevilkår for norsk næringsliv her heime, skriv Caroline Louise Wiig i FpU.
Dette er eit meiningsinnlegg og gjev uttrykk for skribenten sine eigne meiningar.
Det var ein einaste stor hagefest, pressefolk og støttespelarar hadde samla seg for å feira Liberation Day.
«Landet vårt har blitt rana, plyndra og valdteke», sa Donald Trump då han onsdag kveld kl. 22 norsk tid kunngjorde at han ville innføre 20 prosent toll på varer frå EU. Ifølgje Trump var dette heilt på sin plass.
Norsk eksport
USA er verdas største økonomi. No varslar Trump kraftig toll og Noreg – som er heilt avhengig av eksport, kjem til å bli sterkt ramma. Vi sit som ein propp i vatnet: små og sårbare, vi er heilt avhengige av at handelen rundt oss flyt fritt.
Kvar femte norske arbeidsplass er avhengig av eksport.
Sjømatnæringa er eitt døme på korleis norske bedrifter er tett knytte til internasjonal handel. Salmar, eigd av Witzøe-familien, sender tonnevis med laks til USA kvart år.
Med dei nye tollmurane kan dette ende med at heile marknaden for norsk sjømat i USA krympar. Det betyr ikkje berre mindre tilgang til norsk delikatesse for amerikanarar, men også store økonomiske konsekvensar for både bedrifter og arbeidsplassar her heime.
Noreg vil også bli ramma indirekte på grunn av tollsatsane som vil gjelde for andre land. Bedrifter som eksporterer delar av varer til EU, vår største handelspartnar, vil møte utfordringar når varene skal vidare til USA.
Økonomisk krise gav grobotn for nazistane
Finansminister Jens Stoltenberg kallar det «det mest alvorlege tilbakeslaget for open handel sidan mellomkrigstida».
Den store depresjonen på 1930-talet førte til massiv arbeidsløyse. I Tyskland var den økonomiske krisa ein av mange faktorar som bidrog til nazistane og Hitlers framvekst.
Historia må ikkje gjenta seg, men ho minner oss om kva som skjer når proteksjonismen får spela ut i fri dressur.
Arbeidarpartiet og Senterpartiet har lenge stått i spissen for ein næringsfiendtleg politikk. I 2022 fekk vi ein kraftig auke i både selskapsskatt og utbytteskatt – heile 6 prosent på eitt år. I ei tid med uro i verda er det viktigare enn nokon gong at vi har trygge og stabile rammevilkår for norsk næringsliv her heime.
«Difor må me ta eit oppgjer med Black Friday»
«Fingrane av opplæringslova – nei til skulegudstenester!»
