«Kongehuset er korkje «umoderne» eller «utdatert» – tvert om»
Dagens monarki fungerer veldig godt, og er ein viktig del av demokratiet og kulturen i Noreg, meiner Dordi Boksasp Lerum, sentralstyremedlem i Senterungdomen.
![](https://framtida.no/wp-content/uploads/2024/01/240118-Bilde-fra-Blefjell-160x160.jpg)
Dette er eit meiningsinnlegg og gjev uttrykk for skribenten sine eigne meiningar.
På sundag fyller prinsesse Ingrid Alexandra 20 år. I framtida skal ho ein gong bli Noregs dronning og monark, og vere ein samlande leiar for heile landet. Samstundes truar fleire parti med å avskaffe monarkiet. Korleis kan ein vere så historielaus?
Frå Harald Hårfagre
Det norske monarkiet går langt attende i tid. Heilt frå då Noregs fyrste konge, Harald Hårfagre, samla Noreg på 900-talet, til kong Håkon den 7. vart signa etter unionsoppløysinga i 1905, og til dagens kong Harald.
I Noreg står monarkiet sterkt. Då NRK gjorde ei meiningsmåling blant ungdommar mellom 16 og 20 år for eit par år sidan var det under 1 av 10 som ynskja å avskaffe monarkiet. Heile 76 prosent av ungdommane ynskja kongedømet Noreg ei framtid. Folk flest er meir enn nøgde med kongefamilien vår.
Samstundes vil partiet Venstre, i tillegg til krefter i Frp, AP, Høgre og SV avskaffe kongehuset. Dei er altså i total utakt med resten av befolkninga. Kva er det som får dei til å ville fjerne ein av dei viktigaste institusjonane i det norske samfunnet?
Samlande kongefamilie
I dag har vi eit moderne monarki, der kongefamilien utelukkande fungerer som samlande for folket.
![quote-left](https://framtida.no/wp-content/themes/framtida/meining/images/quote-left.png)
Monarkiet i Noreg har heile vegen utvikla seg i takt med samfunnet elles.
![quote-right](https://framtida.no/wp-content/themes/framtida/meining/images/quote-right.png)
Kanskje er det akkurat i slike vanskelege tider som vi er inne i no, med forferdelege krigar i verda og dyrtid her heime i Noreg, at eit samlande monarki er på sitt viktigaste. For kongehuset er korkje «umoderne» eller «utdatert» – tvert om. Monarkiet i Noreg har heile vegen utvikla seg i takt med samfunnet elles.
Dagens monarki fungerer veldig godt, og er ein viktig del av demokratiet og kulturen i Noreg. Det er heilt utan meining å skulle fjerne noko som fungerer så godt som det kongehuset i Noreg gjer.
Gratulerer med 20-årsdagen til den Høgvørde Prinsesse Ingrid Alexandra!