KrFU vil kutta i sjukeløn og BSU
Denne artikkelen er eldre enn 1 år gamal. Det betyr at noko av informasjonen kan vere utdatert.
Vil kutta i sjukeløn og BSU
– Om me meiner alvor med ein berekraftig velferdsstat må me kutte både i godar for unge og eldre, seier KrFU-leiar Ida Lindtveit i ei pressemelding.
Dei har ei rekkje kuttforslag til regjeringa sitt forslag til statsbudsjett for 2016.
LES OGSÅ: Unge Høgre og FpU krev høgare BSU-grense
Lågare aldersgrense for BSU
I motsetnad til ungdomspartia Unge Høgre og FpU ønskjer ikkje KrFU noko auke i bustadsparing for unge (BSU), og føreslår attpåtil å redusere aldersgrensa for BSU til 28 år.
Regjeringa auka allereie i fjor taket for BSU-sparing. Før kunne ein spare 20.000 kroner i året til ein hadde maks 150.000 kroner på kontoen.
I dag kan unge opp til 33 år spare 25.000 kroner årleg med skattefrådrag og gunstige renter. I tillegg vil regjeringa auka maksgrensa for BSU frå dagens 200.000 til 300.000 i 2016.
– Me meiner at det er ein del av vårt ansvar å spara meir for framtidige generasjoner og bruka mindre enn i dag. Stortinget bør difor allereie no byrja omstillingsprosessen, seier KrFU-leiar Lindtveit, som tok over vervet etter Emil André Erstad under landsmøtet førre helg.
LES OGSÅ: BSU får æra for at ungdom sparar meir
Vanskelege diskusjonar
Regjeringa har i sitt forslag lagt opp til å bruka 194 milliardar kroner frå Oljefondet i 2016. Det er 2,8 prosent av fondets verdi, og ny rekord, ifølgje NRK.
Dette tykkjer KrFU-er feil retning å gå i.
– Om me held fram slik me gjer i dag, kjem statsbudsjettet til å gå med eit underskot på sirka 140 milliardar 2013-kroner i 2060 om me legg til grunn dagens velferdsnivå og arbeidsinnsats, seier Lindtveit.
Ungdomspartileiaren understrekar at dei skal jobba for ein berekraftig velferdsstat.
For å få til det føreslår dei mellom anna å redusera sjukeløna til 80 prosent.
– Me vil ta eit oppgjer med korleis me skal finansiera velferda i framtida. Som eit ledd i ei omstilling må Noreg våga å ta diskusjonar rundt vanskelege tema som til dømes sjukelønn, meiner den ferske ungdomspartileiaren.
Kutt i sjukeløn er noko både samarbeidspartiet Venstre og Unge Høgre har teke til orde for tidlegare.
Sjå fleire forslag frå KrFU i faktaboksen.
Faktaboks
KrFU sine kuttforslag:
Halvera auken i forsvarsbudsjettet.
Fjerna forslaget om redusert avkortning til gifte og sambuande pensjonistar.
Inga auke i BSU. Og redusera aldersgrensa for BSU frå 33 til 28 år.
Droppa regjeringa sitt forslag om ein ekstra skuletime i naturfag
Kutta 1 milliard kroner i tilskot til utbyggingsselskapet for veg, Nye Veier AS.
Prisjustera avgifta på drivstoff
Auka CO2-komponent i eingongsutgifta
Stoppa kutt i formueskatten
Redusera sjukeløna til 80 prosent med unntak for gravide og kronisk sjuke
Auke avgiftene på sukker, alkohol og tobakk
