Kan bli 5 grader varmare om nokre tusen år
Modellering av temperaturen på landjorda dei siste 2 milionar år indikerer opp mot 5 grader temperaturauke dei neste par tusen åra.
Denne artikkelen er eldre enn 1 år gamal. Det betyr at noko av informasjonen kan vere utdatert.
Denne veka publiserte Nature ein studie av Caroly W. Snyder, klimaforskar ved Stanford University i California. Snyder har modellert den gjennomsnittlege overflatetemperaturen på jordkloden dei siste 2 millionar år, basert på svært samansette data og rekonstruksjonar.
Studien viser korleis overflatetemperaturen vart sakte lågare fram til om lag 1,2 millionar år sidan. Endringane i overflatetemperaturen har vore tett kopla til mengda av klimagassar i atmosfæren, også gjennom dei siste istidene.
Datamaterialet kan også nyttast for å forutseie temperaturendringar i framtida.
Snyder skildrar det slik:
«Dette resultatet indikerer at stabilisering av dagens nivå av klimagassar kanskje allereie fører til ei eventuell oppvarming av jordkloden på 5 grader Celisius over dei neste tusenåra, ettersom isdekke, vegetasjon og støv i atmosfæren responderer på global oppvarming.»
