Hastverk, alvor og optimisme på Zerokonferansen
Marius Holm meiner kampen mot klimaendringane er prega av hastverk, alvor og optimisme. Måndag opna han Zerokonferansen.
Denne artikkelen er eldre enn 1 år gamal. Det betyr at noko av informasjonen kan vere utdatert.
Hastverk, alvor og optimisme
– Det ser stygt ut, men det er ein liten revolusjon i det stille når det gjeld fornybar energi og elbilar. Endringar er i ferd med å skje, og det gir grunn til optimisme, seier leiaren i miljøstiftinga Zero, Marius Holm til NTB.
Han viser til at ny teknologi i transport og kraftindustri er det aller viktigaste for å kutte utsleppa av klimaskadelege gassar som CO2.
Dessutan er solenergi i ferd med å bli ei konkurransedyktig energikjelde, forklarar Holm.
– Eg trur ikkje oljenoreg er klar over kva dynamikk som er i ferd med å oppstå her, seier han.
Samtidig kviler alvoret tungt over konferansen. Ny forsking som skal leggjast fram underbyggjer alvoret i klimatrusselen, og forhandlingane om ein ny global klimaavtale står i stampe.
FNs tidlegare generalsekretær Kofi Annan er hovudtalar på konferansen i år.
Prøv deg på den store klimaquizen!
Marius Holm brukte talen sin på Zerokonferansen til å setje søkelys på korleis vi forvaltar den felles formuen vår. Staten sin pensjonsfond utland er verdas største av sitt slag med snautt 4000 milliardar kroner i investeringskapital. Nesten 250 milliardar er investert i kull, olje- og gasselskap. Dette får Holm til å spørje om vi veddar mot vår eigen klimapolitikk:
– Majoriteten av verda si kjende karbonreservar må bli liggjande i bakken viss vi skal kome i mål med 2-gradersmålet. Konsekvensen er at verdet av aksjane våre i kull, olje- og gasselskap fall når vi vedtek god klimapolitikk.
Stor marknad
Holm viser til at Europa treng rekordhøge investeringar i infrastruktur til fornybar energi. Han meiner pengane vil gjere betre nytte for seg der, i tillegg til at det reduserer Noregs samla eksponering mot prisen på Co2.
– Europa treng 500 milliardar kroner i årlege investeringar i infrastruktur til fornybar energiproduksjon. Dette er eit stort marknad for sikre investeringar i dei gode klimaløysingane, seier Holm.
Han lanserte Zeros Finansinitiativ for korleis vi skal forvalte den felles formuen vår.
– La oss selje investeringane i fossile energiaksjar og investere i det vi trur på, i dei løysingane som skal hjelpe oss å hindre global oppvarming, avslutta Holm.
Følg Zerokonferansen på Twitter:
