– Ein viktig siger for demokratiet
Fleirtal i Oslo Bystyre for å la 16-åringar få stemma ved lokalvalet.
Denne artikkelen er eldre enn 1 år gamal. Det betyr at noko av informasjonen kan vere utdatert.
Stemmerett for 16-åringar blei gjennomført som eit prøveprosjekt i 20 kommunar ved førre lokalval i 2011. Onsdag ettermiddag vedtok bystyret å gå inn for stemmerett for 16-åringar etter at SV tok opp saka som eit privatforslag.
– Dette er ein viktig siger for demokratiet, ungdom og SV. SV er veldig nøgd med å få gjennomslag for at 16-åringar får stemma i kommunevalet i 2015. Det handlar om å ta ungdom på alvor og utvida demokratiet. Evalueringar frå prøveordninga frå 2011 viser at 16-åringar som fekk vera med i prøveordninga og stemma var meir interessert i politikk enn dei som ikkje var med i ordninga. Og dei røysta meir enn andre førstegangsveljarar, seier Ingvild Reymert (SV) til Osloby.no.
LES OGSÅ: Er grensa på 18 år katastrofal?
Det er i første omgang snakk om ei forsøksordning der 16-åringar skal få lov til å stemma.
Arbeidarpartiet har tidlegare vore skeptiske til å la 16-åringar stemma, men i mars gjekk gruppemøtet til Oslo Ap inn for ei prøveordning med stemmerett for 16-åringar i lokalvalet i hovudstaden.
Høgre og Framstegspartiet stemte mot å la 16- og 17-åringane få stemma.
– Eg synest dette er uheldig fordi fleirtalet i bystyret bryt dei koplingane ein har mellom stemmerettsalder og myndigheitsalder. Det er feil at ungdom skal vera med på å bestemma over andres liv før dei er myndige og kan bestemma over seg sjølv, seier Eirik Lae Solberg, gruppeleiar for Høgre, til Osloby.no.
Røysterett for 16-åringar er noko LNU – Noregs barne- og ungdomsorganisasjoner har jobba for i mange år.
– Vi er svært glade for at Oslo no banar veg, og håpar fleire følgje dømet deira, seier leiar i LNU, Stian Seland.
Kva meiner du? Er det på tide at 16-åringar får stemmerett?
