Listhaug vil senda migrantar tilbake til Afrika
Flyktningar og migrantar som tek den farlege vegen over Middelhavet, bør sendast tilbake til Afrika, meiner innvandringsminister Sylvi Listhaug (Frp).
Denne artikkelen er eldre enn 1 år gamal. Det betyr at noko av informasjonen kan vere utdatert.
Listhaug vil senda migrantar til Afrika
Søndag blei det kjent at det tyske innanriksdepartementet går inn for å stoppa den farlege ferda til flyktningane og migrantane over Middelhavet ved å returnera dei som prøver å koma til Europa, til Afrika, skriv ABC Nyheter.
Forslaget kjem som ei følgje av at minst 4.200 menneske har mist livet så langt i år i forsøket på å ta seg over frå Nord-Afrika i skrøpelege farkostar.
Forslaget har fått støtte i Danmark – og no også av den norske statsråden.
– Eg meiner det er svært positivt om ein finn løysingar som gjer at ein trygt kan setja migrantane i land på den afrikanske sida, seier Listhaug, som meiner EU-grenseoperasjonen Frontex i Middelhavet har blitt ein del av bedriftsplanen til menneskesmuglarane.
– Dei sender ut utrangerte, overfylte og farlege båtar med lite vatn, lite mat, lite bensin og ein satellittelefon som migrantane kan nå den italienske kystvakta med for å bestilla redningsoperasjon, seier ho til ABC Nyheter.
– For å kunna hjelpa dei som har eit reelt behov for vern, er det heilt avgjerande at vi klarar å stoppa straumen av økonomiske migrantar over Middelhavet, seier ho vidare.
Så langt er ikkje forslaget lagt offisielt på EU-bordet frå tysk side. (©NPK)
LES OGSÅ: 5.700 barn og unge i asylmottak
LES OGSÅ: – Flyktningkriser kjem igjen og igjen til politikken blir endra
