Før var han hiv-positiv. Nå er han bare positiv.
Gunnar Solvang gjer comeback på tv-skjermen
Denne artikkelen er eldre enn 1 år gamal. Det betyr at noko av informasjonen kan vere utdatert.
– Men då TV2 ringte var eg veldig skeptisk. Eg har verkeleg ikkje noko behov for å komma på tv igjen. Men så blei eg overtalt, då, fortel Gunnar Solvang,
I morgon kveld er han hovudpersonen i TV2 sitt dokumentarprogram ”Vårt lille land”.
Gunnar Solvang har vore på tv før. I 1996 var han hovudperson i TV2-programmet Dokument 2. Temaet då var hiv-diagnosen han fekk tidleg på 1990-talet. Solvang, som hadde fått beskjed frå legane om at han hadde to år igjen å leva, hadde då levd med dødsdommen i halvanna år.
I dag, tjue år seinare, lever han i beste velgåande. Medisinane han går på har fjerna hiv-viruset frå blodet og kroppsvæskene hans. I praksis er han ikkje lenger hiv-positiv og er såleis smittefri så lenge han tar sine daglege medisinar.
LES OGSÅ: Verdsmeistrar i ubeskytta sex
I dag er 67 år gamle Gunnar Solvang pensjonist. Han innrømmer at han har kjeda seg enormt på dagtid sidan han gjekk av i juni i år. Med fulltidsjobb som rettleiar i fronten på Nav Sauda hadde han travle og innhaldsrike dagar.
– Eg vurderer å søka meg jobb hos Hero, når dei etablerer eit asylmottak i Sauda. Eg vil gjerne ut i jobb igjen. Eg blir rastlaus av å bare gå heime, innrømmer han.
LES OGSÅ: Camilla står fram som hiv-positiv: – Hei, angst!
TV2 var i Sauda og filma Gunnar Solvang og livet hans i desember i 2014. Den tjue år gamle hiv-diagnosen er ikkje lenger hovudfokuset for tv-produsentane. Nå handlar det mykje om pianospelinga han starta med som 63-åring og om hans nye rolle som bestefar.
Faktaboks
HIV står for «Human Immunodeficiency Virus», medan AIDS star for «Acquired immune deficiency syndrome». Kort forklart – HIV er eit virus som går til angrep på immunforsvaret ditt, og AIDS er sjukdommen du får når immunforsvaret er svekka nok – det som til slutt er dødeleg.
Då sjukdommen eksploderte på 80-talet vart det raskt eit frykta virus – mest av alt fordi det ikkje fanst nokon kur eller vaksine. Me har framleis ikkje nokon vaksine mot HIV, men med rett behandling kan ein hindra at HIV reproduserer seg og spreier seg i kroppen.
