Ytre høgre-parti med braksiger i tysk delstatsval

– Vi har skapt historie. Vi fekk det nett slik vi ville, sa leiarkandidat Ulrich Siegmund i AfD Sachsen-Anhalt til avisa Märkische Allgemeine.

Ytre høgre-partiet Alternative für Deutschland (AfD) har fått ein overveldande siger i delstaten Sachsen-Anhalt i Tyskland denne helga.

Med 43,8 prosent av røystene har partiet likevel ikkje klart å sikre seg fleirtal.

Partiet treng fleirtal for å styre. Dei andre partia i Tyskland har nemleg sett opp ei såkalla «brannmur» mot partiet. Dei har svore at dei ikkje vil samarbeide med AfD fordi dei er redde for at ytre høgre skal få makta igjen.

Samstundes har det venstre-populistiske partiet BSW hinta om at dei kan vere villige til å samarbeide på nokre punkt, som vil vere nok til eit fleirtal for AfD.

– Vi rekker ut ei hand til alle demokratiske krefter som vil ha betre politikk, sa Siegmund etter sigeren. Han la til at dei ikkje var villige til å inngå kompromiss på tema som migrasjon og nasjonal tryggleik.

Høgre-ekstremistisk

AfD-avdelinga i delstaten har blitt klassifisert som høgre-ekstremistisk av den tyske tryggingstenesta.

AfDs toppkandidat lova å deportere så mange migrantar som mogleg dersom partiet fekk makta i den austtyske delstaten.

Forretningsmannen Elon Musk har vore ute og gratulert AfD med sigeren på X.

Musk har tidlegare skrive at «berre AfD kan redde Tyskland».

Tap for partiet til kanslaren

Til no har det vore Kristendemokratane (CDU) som har leia delstaten på to millionar innbyggjarar. Det er partiet til den sittande kanslaren i Tyskland Friedrich Merz, som for tida ikkje er så populær.

Partiet hans fekk denne gongen 17 prosent av røystene i delstaten, halvparten av resultatet frå førre val. Valdeltakinga var rekordhøge 76,5 prosent.

CDU seier tapet er bittert, men at dei framleis nektar å samarbeide med AfD.