Klar for studiet? Ikkje gløym studiestøtta
Studiesvara er klare. Lånekassen oppmodar nye studentar om å søkja studiestøtte så raskt som mogleg for å få pengane på plass til studiestart.
– Så snart du har fått studieplass, er det berre å gå inn på nettsida og fylla ut søknaden om studielån, seier kommunikasjonsdirektør Anette Bjerke i Lånekassen.
20. juli har 150 000 søkjarar fått svar på søknadene om høgare utdanning gjennom Samordna opptak. For mange er neste steg å søkja studiestøtte.
Hugs å melda frå
– Me oppmodar alle studentar til å søkja så fort som mogleg for å få raskast mogleg svar, seier Bjerke.
For å få pengane utbetalte er det viktig å hugsa på semesteravgifta og signera avtalen.
– Det aukar sjansen for at du får pengane til studiestart og første utbetaling 15. august. For dei fleste vil det vera viktig å få ting på plass før ein set i gang med studiane, mellom anna pengar til ein stad å bu og bøker, forklarer Bjerke.
Om du ombestemmer deg om studiestad, er det viktig at du melder inn ny informasjon.
– Me må passa på at me har rette og oppdaterte opplysningar slik at studiestøtta blir gitt på rett grunnlag.
Pass på pengebruken
Basislånet for eit års heiltidsstudium er no på litt over 170 000 kroner. I august får studentane ei større utbetaling, såkalla «storstipend» på nesten 31 000 kroner.
– Det er viktig å hugsa at dei vidare utbetalingane er lågare, på rundt 11 600 kroner i månaden, seier Bjerke.
Ho oppmodar til å disponera pengane så godt det lèt seg gjera.
– Me veit at mange studentar har ein deltidsjobb ved sida av studiane. Me ser at det er stadig fleire som tener meir pengar enn inntektsgrensene, seier Bjerke.
Andelen studentar som får redusert stipend på grunn av at dei har tent meir enn inntektsgrensene, er dobla frå rundt 10 til litt over 20 prosent dei siste ti åra.
– Du kan gjerne jobba ved sida av studiane, men om du er oppteken av å maksa stipenddelen, må du halda deg under inntektsgrensa, som er på 234 821 kroner når du får støtte til heiltidsstudium frå hausten.
Alle studentar kan få studielån, og inntil 40 prosent av lånet kan gjerast om til stipend når studiepoeng og grad er bestått.
– Jo meir du tener, jo lågare blir stipenddelen.
Fristen for å søkja lån og stipend er 15. november for haustsemesteret og 15. mars for vårsemesteret.
