Satirefigur kan bli parlamentsmedlem i Storbritannia
Count Binface kan bli den einaste som utfordrar Reform UK-leiar Nigel Farage i eit val i den britiske valkrinsen Clacton.
I Storbritannia har ikkje parlamentsmedlemmene vararepresentantar slik som i Noreg. Når ein representant går av før valperioden er over, må det derfor haldast eit suppleringsval for å fylle plassen.
Nigel Farage er leiar for det høgrepopulistiske partiet Reform UK, som dei siste månadene har toppa fleire meiningsmålingar i Storbritannia. Denne veka trekte Farage seg som parlamentsmedlem for Clacton, samstundes som han kunngjorde at han stiller til attval. Det britiske parlamentet granskar Farage for ikkje å ha opplyst om økonomiske gåver han har teke imot, men han avviser at han har gjort noko gale.
Kritikarar meiner han utløyste suppleringsvalet for å flytte merksemda bort frå granskingssaka. Samstundes har fleire av dei største rivalane varsla at dei vil boikotte valet. Dermed kan Count Binface bli den einaste motkandidaten, skriv The Guardian.
Count Binface er ein satirisk politikarkarakter skapt av komikaren Jon Harvey. Han opptrer i romvesendrakt og skildrar seg sjølv som leiaren frå planeten Sigma IX. Han har tidlegare stilt til val mot mellom anna Boris Johnson og Rishi Sunak.
– Dersom menneska i Clacton, i det usannsynlege tilfellet, føretrekkjer meg framfor gamle Nige, skal eg gjere mitt aller beste for å representere dei, seier Count Binface til The Guardian.
Tidlegare har han mellom anna lova pristak på croissantar og at wifien på toga faktisk skal verke.
Den uventa valkampen har skapt stort engasjement. Count Binface har fått tusenvis av meldingar frå frivillige som ønskjer å hjelpe til, medan hans eigen innsamlingsaksjon har fått inn meir enn 15 000 britiske pund det første døgnet.
