Vekas viktigaste: Jordskjelv i Venezuela og hetebølgje i Europa

Enorme skadar etter jordskjelv i Venezuela

To store jordskjelv har ramma Venezuela. Den midlertidige presidenten, Delcy Rodríguez, har erklært unntakstilstand i landet.

Fredag morgon er minst 254 menneske stadfesta døde og minst 4300 skadde, ifølgje NRK. Tala er venta å stige, og ekspertar anslår at det kan vere snakk om mellom 10 000 og 100 000 omkomne, skriv VG. Fleire tusen er meldt sakna etter skjelva.

Det allereie kriseramma landet er dårleg skikka til å handtere ein slik katastrofe. Mange år med sanksjonar frå andre land har ført til at nesten åtte millionar menneske har behov for humanitær hjelp, allereie før skjelva, ifølge FN.

Det fyrste skjelvet hadde ein styrke på 7,2 på Richters skala. Det andre hadde ein styrke på 7,5. Skjelva var kraftigast nord i landet, ikkje langt unna hovudstaden Caracas.

Dødsfall og drukningar under hetebølgje i Europa

Etter ein rekordvarm mai har Europa no ein rekordvarm juni, skriv BBC.

Over 200 dødsfall i Spania blir knytt til den pågåande hetebølgja i Europa, ifølgje nyheitsbyrået AFP. Landet har hatt den varmaste junidagen som nokosinne er målt der. I Italia er det raudt farevarsel over heile landet.

Onsdag heldt gradestokken i Frankrike eit snitt på meir enn 30 gradar døgnet rundt, og landet målte sin varmaste dag nokosinne. Over 40 menneske har drukna i Frankrike sidan midten av førre veke. Statsminister Sébastien Lecornu fortel at dei fleste var unge, og at ulykkene skal ha skjedd på stader utan badevakter. Tre barn er også funne døde i bil i Frankrike, og dødsfalla blitt sett i samanheng med ekstremvarmen.