Elon Musk tapte i retten mot OpenAI

Måndag 18. mai vart det kjent at Elon Musk tapte søksmålet sitt mot OpenAI. Hovudgrunnen til juryen er at Musk venta for lenge med å saksøkje Sam Altman og selskapet.

Etter ei tre veker lang rettssak, der dei fekk høyre forklaringane til både Musk og Altman, brukte juryen under to timar på måndag til å bli samde om å frikjenne OpenAI.

Føler seg lurt

Elon Musk skulda Sam Altman for å gjere om OpenAI frå ein ideell organisasjon, altså ein organisasjon som ikkje har som mål å tene pengar, til eit kommersielt selskap. Musk donerte 38 millionar dollar til OpenAI i startfasen.

Musk seier han føler seg lurt av Altman. Han meiner at det opphavlege målet til OpenAI var å vere ein ideell organisasjon med mål om å utvikle kunstig intelligens for å hjelpe menneskeslekta.

Då Altman tok imot pengane hans og gjorde om OpenAI til eit kommersielt selskap, meiner Musk at han braut kontrakten om å vere ein ikkje-kommersiell organisasjon.

I søksmålet kravde Musk at 134 milliardar dollar skulle bli flytta frå OpenAI sin kommersielle del til den ikkje-kommersielle delen av selskapet. I tillegg kravde han at Altman og ein person til skulle bli fjerna frå stillingane sine.

Vil anke

Elon Musk donerte pengar til OpenAI i 2015, og forlét selskapet i 2018. Juryen var difor einstemmig samde om at fristen for å saksøkje hadde gått ut. Dei meinte også at det var nok bevis på at Musk var klar over at planen til OpenAI alltid var å bli til ein ikkje-kommersiell organisasjon.

Dommaren i saka Yvonne Gonzalez Rogers stilte seg bak juryen si avgjerd, og frikjente med det Sam Altman og OpenAI.

Musk har sidan kritisert avgjerda på X og sagt at han vil anke saka. OpenAI sin advokat William Savitt seier at dei er «nøgde med at juryen har komme fram til riktig resultat.»