Raud Ungdom vil vurdere «folkemilits» – Raudt tek avstand
Raud Ungdom skal på landsmøtet sitt i påska behandle eit forslag om å erstatte hæren med ein såkalla folkemilits.
– Arbeidarrørsla må organisere eigne sjølvforsvarsorganisasjonar for å forsvare streikar, demonstrasjonar, okkupasjonar og møte frå fascistar og politi. Vi krev at hæren blir lagd ned, og blir bytt ut med ein folkemilits under den demokratiske kontrollen til arbeidarrørsla, heiter det i forslaget som er tilrådd vedteke av redaksjonskomiteen til organisasjonen, men ikkje vedteke, skriv Klassekampen.
Leiar Halvor Bergkvist i Raud Ungdom vil ikkje kommentere innhaldet i forslaget.
– Eg er ikkje forslagsstillar og forslagsstillar må svare for kvifor forslaget er stilt. Han understrekar samtidig at organisasjonen tek avstand frå politisk vald.
Halvor Bergkvist er leiar i Raud Ungdom.
Forslagsstillaren ønskjer ikkje å kommentere saka eller forklare kva dei meiner ein «sjølvforsvarsorganisasjon» skal gjere eller kva dei legg i ein folkemilits.
Moderpartiet Raudt tek tydeleg avstand frå forslaget.
– Dette forslaget skil seg fundamentalt frå Raudts politikk for eit sterkt og uavhengig forsvar med allmenn verneplikt og under demokratisk kontroll, seier partisekretær Reidar Strisland.
Han peikar på at partiet vil styrkje Forsvaret, ikkje erstatte det med ein milits. På spørsmål om det er samsvarande å vedta forslaget og framleis vere ungdomsorganisasjonen til Raudt, svarer partisekretæren:
– Raud Ungdom får gjere vedtaka sine, seier Strisland.
