– Kast kleda i vårsola
Du blir ikkje forkjølt om du kastar kleda i vårsola, meiner ekspertane.
Denne artikkelen er eldre enn 1 år gamal. Det betyr at noko av informasjonen kan vere utdatert.
– Det er mykje betre å få sol på kroppen enn å vere livredd for forkjøling, seier fastlege Kenneth Gutterup til NRK.
Sommarklede i vårsola er ikkje ein billett til forkjøling, slår han fast.
– For det første er forkjøling eit virus, og vi blir ikkje forkjølt av kulde. Vi kan bli fortare forkjølt viss vi har frose. Då får eit virus lov til å setje seg, men det er veldig forskjellig frå person til person, forklarer Gutterup.
Han fortel at nokre nemleg toler å fryse litt utan å bli forkjølte, medan andre kan bli sjuke. Det handlar om den evna immunforsvaret har til å ta knekken på virus.
Legen meiner vi godt kan ta av oss når vårsola varmar.
– Ja, det er ikkje så farleg om vi skulle få litt sol på kroppen og masse gode D-vitamin. Om det betyr bikini, må ein jo kjenne på sjølv. Men ikkje ver redd for å fryse litt, vi må ikkje gløyme at vi stammer frå vikingane, seier han.
For å unngå forkjøling skal du ikkje ta deg i ansiktet. Ikkje bruk fingrande til å klø deg i auge, plukke deg i nasen eller pirke i tennene. Hald deg unna alle våtområde med hendene dine, er råda frå legen.
– Klør du deg under nasen og tar på dørhandtaket på butikken etterpå, kan du både bli smitta og smitte andre. (©NPK)
LES OGSÅ: I år blir sommaren litt lengre
