Nordmenn er bekymra for krig: – Med god grunn
Mange nordmenn trur verda vil oppleva fleire krigar dei neste åra. – Men me må ikkje mista håpet. Håp er viktig for å halda ut – og handla, seier Norad-direktør Gunn Jorid Roset.
Ei ny undersøking utført av Opinion for Norad, viser at 76 prosent av dei spurde er bekymra for krig og konflikt, og at 55 prosent trur at verda vil oppleva fleire krigar eller konfliktar dei neste tre åra. 85 prosent meiner internasjonalt samarbeid er viktig for å løysa krig og konflikt.
Fredsarbeid og konfliktførebygging sparer både liv, liding og pengar, samanlikna med kostnadene ved gjenoppbygging etter krig. Her kan bistand og langsiktig utviklingssamarbeid potensielt spela ei større og viktigare rolle, seier Norad-direktør Gunn Jorid Roset i ei pressemelding.
– Nordmenn er bekymra, med god grunn. Men me må ikkje mista håpet. Håp er viktig for å halda ut – og handla. Å byggja fred betyr å ta tak i det som forårsakar konflikt, seier Roset.
Tal frå Global Humanitarian Overview viser at 239 millionar menneske hadde behov for akutt nødhjelp og vern ved inngangen til 2026. Eitt av fem barn i verda lever i eller flyktar frå konfliktsoner.
Konfliktane blir også meir brutale: 90 prosent av dei som blir ramma av eksplosive våpen i byar er sivile, og bruken av dronar i krig har auka med 4000 prosent sidan 2020, viser tala.
28. januar blir Norad-konferansen 2026 arrangert – titulert «Peace Out?» – i Oslo. Blant deltakarane er FNs høgkommissær for menneskerettar Volker Türk, demokratiforkjemparen Alaa Salah frå Sudan, og dessutan krigsreporterar, nødhjelpsarbeidarar, fredsaktivistar, politikarar og konfliktforskarar frå heile verda.
