Vekas viktigaste: Ungdomskriminalitet, droneaktivitet og Noregspris

13-åringar mistenkt for eksplosjon knytt til kriminelt nettverk

Politiet i Oslo vart varsla om ein eksplosjon på Bislett tysdag kveld.

Det vart kasta to granatar. Den eine handgranaten sprengde i området Pilestredet, den andre vart funnen udetonert i ei gate og vart detonert av politiet.

Ingen menneske vart skadd.

Fire mindreårige gutar, to på 13 år og to på 15 år, vart tekne inn av politiet. 15-åringane er sikta for medverknad til grov ulovleg omgang med eksplosiv, og vart sleppt laus torsdag. 13-åringane er ikkje avhøyrt enno, og blir teke hand om av barnevernet.

Ein av gutane skal ha forklart for politiet at han fekk 30 000 kroner for å gjere jobben.

VG melder at åtaket kan koplast til den svenske gjengen Foxtrot, og at det kan vere ein del av ein større konflikt som også involverer kidnappinga av ein 24 år gamal mann i Oslo førre veke.

Sju nye land anerkjenner Palestina

Denne veka vart Palestina anerkjent som stat av Portugal, Storbritannia, Canada, Australia, Frankrike, Belgia og Monaco under opninga av FN i New York.

Storbritannia og Frankrike er dei første G7-landa som kjem med ei slik anerkjenning.

Det er no 157 av 193 FN-land som anerkjenner Palestina som ein stat.

Danmark vurderer også å anerkjenne Palestina, men har ifølgje NTB lagt fram fleire vilkår for at det skal skje.

Israel er svært kritisk, og seier at anerkjenningane er å «løne terroristar».

Frå denne veka kan du bestille fastpris på straum

Noregspris er ein fast straumpris som regjeringa innfører frå 1. oktober. Det er ei frivillig støtteordning som gjer at prisen blir 40 øre per kilowattime.

Dersom ein ikkje melder seg på ordninga, er det den vanlege straumstøtta som gjeld.

Om det lønar seg, kjem an på forbruket ditt og kvar du bur. Ifølgje Forbrukarrådet er det mest lønsamt med Noregspris i Sør-Noreg, medan det lønar seg mindre for dei i Nord-Noreg. I Midt-Noreg er det lurt å sjå an korleis prisen blir.