Martine Løkken Svendsen meiner Gro Harlem Brundtland er ei legende.
– Mi hjartesak må vere skulemiljø. Vi har høge mobbetal i Noreg, og eit lag rundt eleven som ikkje er i nærleiken av sterkt nok. Det skal både trygge tilsette, motivasjon i læringa og samhald i klasserommet til for at elevane skal trivast på skulen, og det har vi eit ansvar for å sørge for.
Det skriv den nyvalde leiaren av Elevorganisasjonen i ein e-post til Framtida.no. Martine Løkken Svendsen (19) meiner det er mykje som kan gjerast i skulen for å auke trivselen, men at mykje av det ikkje blir brukt tid eller ressursar på.
Martine Løkken Svendsen
Alder: 19
Personleg pronomen: Ho/henne
Frå: Østensjø i Oslo
Yrke/utdanning: Fullført VGS, studiespesialiserande på Elvebakken VGS
Favorittfag på skulen: Politikk og menneskerettar, og historie og filosofi
Ulike verv: Har vore tillitsvald dei siste åra i Elevorganisasjonen i Oslo, både som styremedlem, nestleiar og leiar. Eg har sete i distriktskomiteen til Operasjon Dagsverk i Oslo, og no sit eg som nestleiar i sentralstyret til Elevorganisasjonen.
Medlem i: Elevorganisasjonen
– Eg synest på mange måtar at debatten om skule har blitt til ein debatt om at elevane er kjipe på skulen, og at vi treng meir disiplin for å fikse det. Eg er redd at vi har gløymt kven vi eigentleg endrar på skulen for, det er jo elevane. Og mange av disiplin-tiltaka til politikarane, aukar ikkje trivselen i skulen.
Operasjon Dagsverk
Svendsen er frå Østensjø i Oslo og har dei siste åra vore tillitsvald i Elevorganisasjonen i Oslo, både som styremedlem, nestleiar og leiar. Ho har vore nestleiar i sentralstyret til Elevorganisasjonen, og vart på årets Elevting vald til ny leiar av organisasjonen.
Det var i sitt første møte med Operasjon Dagsverk på ungdomsskulen, at ho verkeleg kjente på at ho gjorde ein forskjell.
– Det året gjekk OD-pengane til ungdom i Palestina. Det var gjennom Operasjon Dagsverk at eg fann Elevorganisasjonen, og fortsette der, fortel den påtroppande leiaren.
Gro og Beyoncé
Svendsen ønsker å vere ein leiar som står sterkt for det elevane meiner, i møte med alle slags folk. Samstundes vil ho vere ein trygg figur for sentralstyret, sånn at dei saman kan vidareføre ei engasjert og motivert elevrørsle.
– Mitt forbilde er nok Gro Harlem Brundtland. Ho vil alltid vere ei legende.
Om den nye leiaren av Elevorganisasjonen kunne invitert ein valfri gjest til eit betre måltid, ville ho ete middag med Beyoncé.
– Ho er favorittartisten min, og eg trur ho har opplevd mykje interessant. Då måtte eg servert noko fancy, som østers.
Stortingsvalet
Dei viktigaste sakene for Elevorganisasjonen no, er sakene dei kjempar for opp mot stortingsvalet. Dei er kampen mot fråværsgrensa, fleire læreplassar og ein meir praktisk og variert ungdomsskule, fortel Svendsen.
– Den største sigeren på årets elevting, var nok valet av ny prioritering. Vi vedtok ei prioritering som heiter «eit rettferdig og lærerikt vurderingssystem». Den skal sikre at vurderingane i skulen skal skje på elevane sine premissar. Dessutan har vi vedtatt at vi støttar langtidsoppgåve som eit alternativ til eksamen.
Den neste kampen blir å sikre at kunstig intelligens (KI) og vurderingar kan sameksistere i skulen.
– Vi veit at KI må inn i skulen, og vi veit at vurderingar er viktige. Det som gjenstår er å finne ut korleis dei kan sameksistere utan eit strengt regime for å hindre juks. Dette inneber å endre på vurderingssystemet slik at det legg til rette for fordjuping, kjeldekritikk og læring.
Vil erstatte eksamen
– Kva er idealsamfunnet og korleis skal vi nå det?
– Idealsamfunnet må vere at alle elevar fullfører opplæringa si, og kjem ut i arbeidslivet motiverte. Utdanning er berebjelken i samfunnet vårt, og legg grunnlaget for resten av livet. Eg vil at alle i samfunnet skal ha hatt ei fin oppleving av å ha gått på skulen. Vi når det ved å styrke laget rundt eleven, ha meir praktisk undervising i skulen og fokusere på mobbeførebyggande tiltak.
Om Martine Løkken Svendsen hadde vakna opp til si draumenyheit, hadde det vore at ein prøver ut langtidsoppgåve som ei erstatning til eksamen.
Dokumentarar og sosiale medium
På fritida er den nye elevleiaren glad i å sjå på dokumentarar, spesielt om historiske hendingar.
– Eg går også mykje tur med hunden min.
– Kva er den største tidstjuven i din kvardag?
– Min største tidstjuv må vere mobilen min, som mange andre. Eg brukar masse tid på sosiale medium!
– Korleis held du deg oppdatert?
– Kvar morgon høyrer eg på Aftenposten forklart, og så les eg nyheitene på veg til jobb.
– Kva for ei bok burde alle lese?
Omslag: Aschehoug
– Eg vil anbefale alle å lese I et speil, i ei gåte skriven av Jostein Gaarder. Den får deg til å tenke over livet, døden, kjærleik og kjensler. I alle fall viss ein likar å filosofere, så anbefaler eg denne boka.
– Kva serie er ditt beste tips akkurat no?
– Sex and the City, eg har nettopp byrja å sjå på det.
– Kva låt får deg alltid i godt humør?
– Tears dry on their own av Amy Winehouse.
