Vekas viktigaste: Ukraina-utspel, G20-møte og faraofunn

Toppmøte i Sør-Afrika

Torsdag starta G20-møtet i Sør-Afrika. G20 er eit internasjonalt samarbeidsforum for dei landa som har definert seg som dei viktigaste økonomiane i verda. Også EU og Den afrikanske unionen er med.

Noreg er i år med som gjesteland, og utanriksminister Espen Barth Eide (Ap) er til stades i Johannesburg. Torsdag var den geopolitiske situasjonen i verda tema for utanriksministermøtet. Til E24 kritiserer Eide Trumps utsegner om Ukraina og åtvarar om den auka innflytelsen til Kina.

Russlands utanriksminister Sergej Lavrov skal vere med på møtet, men USAs utanriksminister Marco Rubio skal ikkje delta.

Tettare oppfølging av unge kriminelle

Byrådet i Oslo planlegg tettare oppfølging av unge kriminelle. Til sommaren kan kommunen starte med éin-til-éin-oppfølging av unge kriminelle, skriv NRK. Politiet har utarbeidd ei liste med 40–50 aktuelle kandidatar som dei meiner treng særleg oppfølging.

Onsdag møttest byrådsleiar Eirik Lae Solberg (H) og Noregs ferske justisminister Astri Aas-Hansen (Ap).

Byrådet har sett av 25 millionar kroner til oppfølging av unge kriminelle, og ber om at staten bidreg med same sum.

Det vil vere frivillig å vere med på programmet for ungdommane. Bydelane skal ha ansvar for å følgje dei opp.

Gruvekollaps i Mali

Minst 48 personar er døde etter at ei gullgruve kollapsa i Kayes-regionen i Mali laurdag, skriv nyheitsbyrået AFP.

Gruva var tidlegare eigd av eit kinesisk selskap, men har sidan vore driven ulovleg. Gruva skal ha kollapsa som følgje av eit jordskred.

Reuters skriv at dei fleste døde er kvinner.

Det er den andre dødelege gruveulukka i landet på tre veker, melder BBC. I slutten av januar mista minst ti menneske livet i ei gullgruve i Koulikoro-området.

Mali er ein av dei største gullprodusentane i Afrika. Mange gruver blir drivne illegalt og har dårleg sikkerheit.

Første faraograv funnen på over hundre år

Grava til oldtidskongen Thutmosis II er funnen i Egypt, opplyser landets styresmakter. Det er over hundre år sidan sist ein fann grava til ein konge. Tutankhamons grav vart oppdaga i 1922.

Grava til Thutmosis II er oppdaga i Kongedalen i Luxor sør i Egypt. Han er ein av forfedrane til Tutankhamon og styrte frå 1493 til 1479 før vår tidsrekning. Thutmosis II var gift med Hatshepsut, ein av dei mest framgangsrike kvinnelege faraoane. Grava inneheldt ingen mumie eller skattar slik Tutankhamons grav gjorde. Studiar tydar på at innhaldet vart fjerna i antikken.

Egyptiske styresmakter kallar likevel funnet eit av dei viktigaste arkeologiske gjennombrota dei siste åra, skriv The Guardian.