Vekas viktigaste: Arrestordre, klimaforhandlingar og banankunst

Marius Borg Høiby varetektsfengsla

Marius Borg Høiby er varetektsfengsla i inntil ei veke med brev- og besøksforbod. Det skjer etter at Høiby, som er kronprinsesse Mette-Marits son, måndag vart pågripen av politiet.

Politiet har denne veka sikta han for to valdtekter, noko han nektar straffskuld for.

Ifølgje politiet gjeld begge sakene seksuell omgang utan samleie med ei kvinne som var ute av stand til å motsette seg handlinga. Politiadvokat Andreas Kruszewski seier dei har kome over valdtektene i etterforskingsmaterialet. NRK erfarer at politiet har videoar som dei meiner viser valdtekt.

Frå før er Høiby sikta for kroppskrenkingar, skadeverk, trugslar, omsynslaus åtferd og brot på besøksforbod, skriv NRK.

Demokratiaktivistar i retten i Hongkong

To dagar denne veka møtte demokratiforkjemparar i retten i Hongkong. Det skriv NRK.

Rettssaka mot 47 prodemokratiske aktivistar er den største sidan det i 2020 vart innført ei streng sikkerheitslov i Hongkong. Lova kom i kjølvatnet av store demokratidemonstrasjonar i 2019.

45 av aktivistane vart dømde til fengsel i mellom fire og ti år. NRK skriv at dei allereie hadde erklært seg eller blitt funne skuldige. To av dei vart frikjende.

Dagen etter den store rettssaka, møtte Jimmy Lai i retten. Han er ein av dei mest profilerte i den hongkongske demokratirørsla. Lai er ein avismogul, og han har allereie vore gjennom fem rettssaker og sete i fengsel i fire år. 76-åringen risikerer fengsel på livstid. I retten denne veka sa Lai at han støtta ytringsfridom, men nekta for å ha støtta eit Hongkong som er uavhengig frå Kina.

Noregs utanriksminister Espen Barth Eide (Ap) uttalar til NRK at straffene til dei 45 aktivistane er djupt urovekkjande og at han er uroa for den rettslege utviklinga i Hongkong.

Innspurt i klimaforhandlingane

Fredag skal FNs klimatoppmøte i utgangspunktet vere ferdig i Aserbajdsjan, men det kan sjå ut som om møtet vil gå på overtid. Fredag morgon hadde partane framleis ikkje kome med ei slutterklæring, men presidentskapet tek sikte på å leggje fram eit nytt forslag til lunsjtider, og ein endeleg tekst i løpet av kvelden.

Ifølgje NRK møtte det første utkastet sterk kritikk. Det globale målet for klimafinansiering er det store temaet på årets klimatoppmøte, men i teksta var de ikkje talfesta kor mykje dei rike landa bør stille opp med.

Utviklingslanda har bede om at den tidlegare summen på 100 milliardar dollar i året, blir auka til 1000 milliardar. Torsdag la ei gruppe utviklingsland, G77 pluss Kina, fram eit nytt krav om 500 milliardar i året.

Eit anna spørsmål er om land som har hatt stor økonomisk utvikling dei siste åra, som Kina og India, skal reknast som utviklingsland i denne samanhengen, eller om dei skal bidra i klimafinansieringsmålet.

Vekas snakkis: Banankunst seld for 6,2 millionar dollar

Kunstverket «Komikar» er seld for 6,2 millionar dollar på ein kunstauksjon i New York. Det svarar til i underkant av 70 millionar norske kroner. Kunstverket er ein fersk banan som er teipa på ein vegg med sølvfarga teip.

Det var italienske Maurizio Cattelan som først stilte ut verket på eit galleri i Miami i 2019, og det vart debatt om kor vidt det var kunst eller ikkje. Onsdag kjøpte Justin Sun, ein kinesiskfødd kryptomeklar, verket.

Sun fortel ifølgje NTB at han har tenkt å ete bananen.