16 år gamal dartsensasjon i VM
16-åringen Luke Littler er tidenes yngste semifinalist i turneringa.
Denne romjula er det ikkje berre fotball og vintersport som har engasjert tv-publikumet. Fleire har òg fått auga opp for dart. Og kanskje spesielt for 16 år gamle Luke «The Nuke» Littler.
Det er første gong han deltek i verdsmeisterskapet i dart, og i debuten har han teke seg heilt til semifinalen. Han har slått ut favorittar som er tre gonger så gamle.
– Eg drøymer no. No er eg to kampar unna å vinne tittelen. Eg tenker på det no, sa Littler etter å ha vunne kvartfinalen, ifølgje VG.
Starta tidleg
Sjølv om det er debuten hans i senior-VM, har Littler vore «i gamet» lenge. I eit intervju med Sky Sports, fortel dart-spelaren at han kasta piler allereie då han var 18 månader og gjekk i bleie.
– Det var då det heile starta.
Littler byrja ordentleg med dart då han var 4-5 år gamal med ei lita dartskive, og i 6-7-årsalderen gjekk han over til standardskive. Han er regjerande ungdoms-verdsmeister.
Littler har òg blitt populær blant publikum. Han har mellom anna fått merksemd for å feire sin første VM-siger med å ete kebab. Undervegs i turneringa vart han invitert til å sjå Tottenham-kamp av fotballspelar James Maddison.
Se dette innlegget på Instagram
Premie
Ikkje berre er Littler tidenes yngste semifinalist, den unge briten har òg sikra seg ein premie på 1,3 millionar norske kroner. Om han kjem seg heilt til finalen og vinn der, vil han gå ut av turneringa heile 6,5 millionar kroner rikare, ifølgje Dagbladet. Den totale premiepotten i dart-VM er på 33 millionar kroner.
Semifinalen i dart-VM blir spelt tysdag kveld.
Oppdatering: I semifinalen tysdag kveld slo Luke Littler Rob Cross 6–2 i sett. Han er dimed vidare i turneringa og den yngste finalisten i dart-VM nokosinne. Finalen blir spelt onsdag kveld.
