Amerikanske senatorar får gå med hettegenserar
Det amerikanske Senatet lempar på kleskodane for senatorar som skal debattera og stemma.
![](https://framtida.no/wp-content/uploads/2023/09/Andrea-Rygg-Nottveit-svartkvitt-e1695973892347-160x160.jpg)
Majoritetsleiaren av det amerikanske Senatet, demokraten Chuck Schumer, har lempa på klesreglane for dei amerikanske folkevalde.
Det inneber at amerikanske senatorar ikkje lenger må kle seg formelt i det som vert omtala som business attire, melder BBC.
Chuck køyrer dress
– Senatorar kan velja kva dei vil ha på seg i Senatet. Eg vil halde fram å ha på dress, sa Chuck Schumer (72) i ei utsegn til CBS.
Kleskodane har ikkje vore fastsett i noko regelverk, men koden har vore slik at senatorane kler seg formelt. Likevel var det først på 1990-talet at det vart akseptert at kvinnene gjekk i bukser.
I Representantenes hus er reglane stemt fram og nedskrive, og det var først i 2019 at det vart tillate å gå med religiøse hovudplagg som hijab.
● Les også: Kan ein gå med shorts på sommarjobben?
– Skaff deg ein annan jobb
Ikkje alle er like glade for dei nye reglane. På Twitter/X skriv tidlegare medlem av representantanes hus for republikanarane og Det libertarianske partiet Justin Amash (43):
– Senatet er ikkje heimen din, ein gym eller ein park. Om du ikkje kan kle deg profesjonelt på jobb i det amerikanske Senatet, gjer oss alle ei teneste og skaff deg ein annan jobb.