Ap seier nei til store leiteoperasjonar på norsk sokkel
Ap-leiar Jonas Gahr Støre seier nei til store, nye leiteoperasjonar på norsk sokkel, men vil halde fram kartlegginga i eksisterande felt.
![](https://framtida.no/wp-content/uploads/2023/11/NPK-160x160.png)
![info](https://framtida.no/wp-content/themes/framtida/images/info.png)
Denne artikkelen er eldre enn 1 år gamal. Det betyr at noko av informasjonen kan vere utdatert.
Under partileiarutspørjinga i Politisk kvarter på NRK onsdag uttalte Støre at han ikkje kan gå med på kravet frå MDG om at partiet ikkje kan støtte ei regjering som vil halde fram med å leite etter olje.
– Då får MDG heller støtte Erna Solberg og Sylvi Listhaug, svarte Støre.
– Ikkje store leiteoperasjonar
Ap-leiaren seier derimot klart at partiet ikkje vil gå inn for at det blir gjennomført nye store leiteoperasjonar på uutbygde felt på sokkelen.
– Det blir ikkje store leiteoperasjonar på norsk sokkel. Vi har sagt nei til Lofoten, Vesterålen og Senja. Men i dei områda der Noreg i dag har installasjonar, røyr og riggar, skal vi halde fram med å kartleggje ressursar. Og det meiner vi er nødvendig for å ha økonomi til å klare det grøne skiftet og få fram dei nye fornybare energikjeldene, sa Støre.
Une Bastholm, leiar i MDG, har tidlegare i valkampen sagt klart frå at partiet ikkje vil støtte eit budsjett som opnar for leiteverksemd, sjølv om ein eventuell statsminister Jonas Gahr Støre då truar med å gå av.
– Flest lisensar i opne område
I ein kommentar til NTB peikar Bastholm på at leitelisensar som er gitt, er i område som allereie er opna.
– Det er flott at Ap avklarer at det ikkje blir nye konsesjonsrundar på norsk sokkel, der det blir opna heilt nye område for leiting. Men nesten alle leite- og utvinningslisensar er i område som allereie er opna. Når vi møtest i forhandlingar etter valet, så er det derfor dei det vil handle om. Eg er sikker på at om vi klarer å bli samde om oljepolitikken, så er det mykje anna det er lettare å bli samd om, seier Bastholm.