Langvarig mangel på p-pille i Noreg
P-pilla Qlaira har vore vanskeleg å få tak i sidan april og kjem ikkje tilbake på lager før til hausten.
Denne artikkelen er eldre enn 1 år gamal. Det betyr at noko av informasjonen kan vere utdatert.
Legemiddelverket har opna for at apoteka kan ta inn utanlandske piller som svarer til Qlaira-tablettane, men også desse er det vanskeleg å få tak i.
– Det har dessverre vore ein usikker leveranse. Vi har høyrt at det er vanskeleg å få tak i tilsvarande p-piller frå utlandet, seier medisinsk fagdirektør Steinar Madsen i Legemiddelverket.
Dei sende i april ut melding om at det er mangel på Qlaira.
Blir brukt som endometriose-behandling
P-pilla blir brukt på grunn av endometriose av ein del kvinner i Noreg, men medikamentet er ingen storseljar. Rundt 2.200 kvinner bruker denne pilla, medan talet på norske kvinner som bruker p-piller, er om lag 300.000.
Den langvarige mangelen er uvanleg og kjem i dette tilfellet av mangel på hormona som skal vere i pillene.
- Kva er sant og usant om prevensjon? Les saka: Prevensjon: – Mytar og misforståingar er nedarva i generasjonar
Bekymra for uønskte graviditeta
Madsen seier at p-piller er ei viktig behandling, og at det kan skape bekymring å måtte byte prevensjon.
– Vi er spesielt redde for at det skal skje uhell i samband med at ein går frå ei pille til ein annan. At det kan oppstå uønskte svangerskap, seier Madsen.
Nokre p-piller gir høgare risiko for blodpropp viss ein byter.
– Norsk helsepersonell er flinke til å skrive ut dei pillene med lågast risiko for blodpropp, seier han.
Også mangel i Sverige
Madsen ber dei som bruker Qlaira, om å kontakte helsepersonell i god tid før ein er tomme for pillene sånn at ein kan få ein annan prevensjon.
Forseinkingane av p-pillene blir merka i fleire land. I Sverige er alle apotek utselt for Qlaira, ifølgje SVTs kartlegging.
- Les om Tamanna Agnihotr som var med på å starta opp eit mensen-talkshow på NRK: – Eg snakkar om mensen heile tida
Foto: Maria Oliva Rivedal/NRK P3
