10 Instagram-bilete som gjorde varig inntrykk – på godt og vondt
6. oktober 2020 er det 10 år sidan Instagram vart lansert. Her er 10 ikoniske bilete som me ikkje gløymer.
Denne artikkelen er eldre enn 1 år gamal. Det betyr at noko av informasjonen kan vere utdatert.
1. Gatehunden som lanserte Instagram
Dyreinnhald er populært på sosiale medium. Difor er det passande at det første biletet som vart lasta opp på Instagram var av ein hund.
Biletet er teke av Kevin Systrom, som er ein av grunnleggjarane av biletdelingstenesta.
– Hadde eg visst at dette skulle verte det første biletet på Instagram, hadde eg prøvd litt hardare, skal Systrom ha sagt til The Daily Telegraph.
Biletet av gatehunden frå Mexico er datert 16. juli 2010 og har nesten 190.000 likarklikk til dags dato.
2. Instagram-egget
Popularitet og likarklikk på Instagram er som kjent alt, men kva kjem først: høna eller egget?
I januar 2019 la reklamemannen Chris Godfrey ut ein post der han oppmoda følgjarane sine til å knusa Kylie Jenner sin Instagram-rekord på likarklikk, og det gjekk!
Dette egget har nesten 55 millionar likarklikk, som er ein god del meir enn Kylie Jenner sitt babybilete av Stormi Webster, som berre har 18,5 millionar.
(Så skal det seiast at egget berre har skarve 5,9 millionar følgjarar, medan Kylie har 197 millionar. Ho kan også skryte på seg å ha posta heile åtte av dei 20 mest likte bileta på Instagram.)
3. Oscar selfie
Denne selfien frå Oscar-utdelinga i 2014 er faktisk på TIME Magazine si liste over dei 100 mest innflytingsrike bileta gjennom tidene!
Skodespelar Bradley Cooper står som fotograf på selfien som programleiar Ellen DeGeneres initierte. Biletet vart først publisert på Twitter, men kom seg sjølvsagt også på Instagram.
3. Beyoncé si babyannonsering
Instagram er den perfekte plattform for image-bygging og iscenesetting, noko få gjer betre enn Queen B.
Beyoncé si offentleggjering av at ho ventar tvillingar var fotografert av Awol Erizku og vart det mest likte biletet i 2017.
5. Friends-reunion
Då Jennifer Aniston skulle gjere sin Instagram-debut, gjorde ho det med eit smell. Ho fekk med seg stjernene frå Friends i eit lite reunion-bilete.
Aniston tok også rekorden med å raskast få éin million følgjarar, noko som skjedde på kun fem timar og 16 minutt.
I september tok Sir David Attenborough over rekorden, på under fem timar.
6. David Attenborough
94 år gamle Sir David Attenborough fortener ein plass på lista fordi han med sin sterke debut beviser at mediumet ikkje berre er for dei yngre, men òg fordi han nyttar sin posisjon til å løfta klimakrisa.
7. #BlackOutTuesday
Instagram har gått frå å vere ein ufarleg plattform for deling av feriebilete, delikate rettar og kjæledyr til å verte ein plattform for å dele politisk innhald.
Kampanjen #BlackOutTuesday fekk mykje kritikk for å vere ei lat form for aksjonisme, men engasjerte brukarar over heile verda farga plattformen svart i kampen mot politivald og rasisme i USA.
Fleire kjendisar nytta også høve til å låna bort sine Instagram-kanalar med mangfoldige tusen følgjarar, til viktige, svarte stemmer. Kampanjen gjekk under emneknaggen #ShareTheMicNow.
7. Kroppspositivisme
Biletdelingstenesta får stadig tyn for korleis det påverkar sjølvbiletet vårt negativt, men Instagram har også gjort mykje for å utvida skjønnheitsideala våre.
Det finst eit utal av kroppspositivistar som deler lettkledde bilete og eit positivt bodskap om å elske deg sjølv slik du er. Her representert ved Lizzo, som omfamnar merkelappen som «roll model».
8. Chrissy Teigen si openheit
Instagram er elska og hata for å framstille livet som ein dans på roser, difor er det desto viktigare at nokon vågar å vise skuggesida.
Modell og kokebokforfattar Chrissy Teigen har fått mykje ros og støtte etter at ho delte den vonde opplevinga av å miste eit ufødd barn.
9. Chadwick Boseman, Kobe Bryant og XXXTentacion
Store stjerner døyr også, og Instagram har vorte ein del av sørgeprosessen.
Då Chadwick Boseman døydde av kreft var biletet av han med beskjeden blant dei mest likte og delte på både Twitter og Instagram.
Også det siste biletet av basketspelar Kobe Bryant og den første og siste oppdateringar frå den kontroversielle rapparen XXXTentacion fekk massiv respons etter dei døydde.
10. 10 year challenge
Kjendisar og vanlege folk over heile verda delte brått gamle bilete av seg sjølv, saman med eit nytt og utfordringa fekk sitt store utspel på Instagram.
Se dette innlegget på Instagram
Hadde faktisk trodd forskjellen skulle vært større? #10yearschallenge
Fleire kritiserte utfordringa i etterkant, fordi den var med på å gi algoritmane mykje ekstra informasjon, som kunne vere uheldig.
Åra med sosiale medium har elles gitt oss mange ulike utfordringar: planking, Harlem Shake, Ice Bucket challenge, Bottle cap, Kanel-utfordringa, Mannequin-utfordringa, Until Tomorrow Challenge. Kva vert det neste?
Les også: Kroppspositivistane forklarar: Kva er #kroppspositivisme, og kvifor treng vi det?
Frå venstre:Wilde Siem (@Happykropp), Carina Carlsen (@Fetmenfattet), Sonja Iren Ebbesen Johnsen (@sonja.iren) og Nastaran Marie Kowkabi (@Nastaranmarie) er alle profilerte kroppspositivistar. Foto: Instagram
