Sjekkar arbeidstakarane på Facebook
Forholdet mellom sjefen og dei tilsette blir sett på prøve når sjefen vil finne ut kva som skjer på Facebook-profilen til arbeidstakarane.
Denne artikkelen er eldre enn 1 år gamal. Det betyr at noko av informasjonen kan vere utdatert.
Kristine Svendsen, ungdomssekretær i LO i Nord-Trøndelag, seier til NRK at fagrørsla får inn stadig fleire meldingar frå ungdomar som er oppgitt over arbeidsgjevarane sine.
– Mange opplever at dei blir konfronterte med det dei har skrive på Facebook, seier Svendsen og understrekar at arbeidsgjevarar skal liggje unna religion og livssyn i tillegg til spørsmål om graviditet og seksuell legning.
Les òg: Single menn styrer på Facebook
Sosiologiprofessor ved NTNU i Trondheim Arne Krokan underviser i bruk av sosiale medium og seier det er vanskeleg å skilje mellom kva som er offentleg, og kva som er privat. Han har vore borte i tilfelle der arbeidsgjevarar har sjekka opp tilsette og kva dei har gjort på Facebook i ein sjukdomsperiode.
– Det er ikkje alltid det er samsvar mellom det dei har sagt på jobben, og det dei har fortalt facebookvenene sine, seier Krokan til NRK. (©NPK)
Les òg: Avslørar søkjarar på Facebook
