54 år etter at den russiske romfararen Alexej Leonov vart første menneske til å utføre ei romvandring, skal eit lag beståande av berre kvinner gjere det same.
No blir dei amerikanske astronautane Christina Koch (40) og Jessica Meir (42) historiske.
Gearing up for Friday’s spacewalk to help the ground teams repair one of the battery channels with @Astro_Christina.
. . . first spacesuit selfie, check!✔️
Photos will be much more spectacular once we pass through the hatch. Be sure to watch live: https://t.co/8ggAQFbzAh pic.twitter.com/oXUDnDvLLY
— Jessica Meir (@Astro_Jessica) October 16, 2019
Åleine for første gong
Christina Koch og Jessica Meir er del av eit astronaut-lag som har fått i oppgåve å byte eit batteri på utsida av den internasjonale romstasjonen (IPSS).
Ifølgje britiske The Guardian har astronautar og kosmonautar utført meir enn 200 romvandringar i samband med byggjinga og vedlikehaldet av IPSS, men likevel har berre 15 kvinner vore med på romvandring. Då alltid saman med menn.
Fredagens planlagte romvandring vert såleis første gong to kvinner skal ut saman og åleine.
- Kor mykje kan du eigentleg om menneskeslektas store sprang? Ta quizen om månelandinga her!
– Verkeleg fint å sjå kor langt vi har kome
I ein video lagt ut på Twitter-kontoen til IPSS får dei to astronautane spørsmål om det plagar dei at prestasjonane deira alltid vert omtalt i eit kjønna perspektiv.
– Eg trur det er viktig på grunn av historia til det vi driv med. I fortida har ikkje kvinner alltid fått plass rundt bordet, svarar Koch.
Ho fortel at det er fantastisk å bidra i romfartsprogrammet i ei tid der alle bidrag vert aksepterte, alle har ei rolle, og at dette kan leie til høgare sjanse for suksess.
– Nokre folk vert motiverte av inspirerande historier frå menneske som ser ut som dei, og eg synest det er ein viktig del av historia å fortelje, seier Koch.
Ho får også støtte av Jessica Meir som seier at jobben dei no gjer, viser alt arbeidet som har vorte lagt ned i tiåra før, og alle kvinnene som har arbeidd for å få dei dit dei er i dag.
– Eg synest det er ein fin ting at vi ikkje tenkjer på det i kvardagen. Det er berre normalt. Vi er ein del av laget. Det er verkeleg fint å sjå kor langt vi har kome.
Den komande romvandringsduoen Jessica Meir og Christina Koch. Foto: NASA/Flickr/CC BY-NC-ND 2.0
Rekordferd
Christina Koch skal ikkje berre ta del i den historiske romvandringa, ho ligg også an til å setje ein annan rekord.
Koch har vore hjå den internasjonale romstasjonen sidan mars og skal verte verande til februar neste år. Om alt går etter planen vil ho slå rekorden for den lengste romferda ei kvinne har utført, med eit venta tal på 328 dagar i verdsrommet.
Curb appeal. It’s not often I get to see my house from the outside. This photo I snapped on my spacewalk last Friday captures the habitable modules that I have called home for the last eight months. Pretty lucky to be living inside an engineering marvel. pic.twitter.com/djbnCstXfN
— Christina H Koch (@Astro_Christina) October 15, 2019
