Fawzi Warsame er innstilt som ny AUF-leiar
Valkomiteen i AUF har innstilt Fawzi Warsame frå Oslo til å ta over som AUF-leiar etter Gaute Skjervø.
– Det er ei enorm ære å bli foreslått til å leie Noregs største politiske ungdomsorganisasjon og vere med på å forme norsk politikk, seier 27 år gamle Warsame i ei pressemelding frå AUF.
Saka vart først omtalt av Aftenposten.
Den nye leiaren skal veljast på landsmøtet til AUF i oktober, men valkomiteen har no komme med forslaget sitt til ny leiing.
Fabian Wahl Sandvold (25) frå Vestfold blir innstilt til ny generalsekretær. Kristine Holden (23) frå Trøndelag og Sandra Kalland Tenud (28) frå Vestland blir innstilt til nestleiarar.
– Med denne innstillinga får AUF eit sterkt lag som er klart til å leie organisasjonen inn i framtida, seier leiaren av valkomiteen i AUF Jakob Vorren i pressemeldinga.
– I Fawzi Warsame vil AUF få ein hardtarbeidande og tydeleg ideologisk leiar som vil setje sitt preg på samfunnsdebatten, seier Vorren.
Dagens AUF-leiar, Gaute Skjervø, varsla i sommar at han ikkje tek attval og ønskjer å gi seg etter landsmøtet.
Warsame varsla sitt kandidatur til AUF-toppvervet i eit intervju med VG i juni.
– Arbeidarpartiet gjer mykje bra på mange felt, men sanninga er at vi har styrt landet i seks år og vi ser at forskjellane framleis aukar. Det må vi ta på alvor og sjå på dei rekningane folk faktisk har på bordet, sa han mellom anna.
