Demokratiaktivist Joshua Wong ventar ny dom

Joshua Wong er tiltalt for å ha forsøkt å få utanlandske land og organisasjonar til å innføre sanksjonar og andre tiltak mot Hongkong og Kina. Påtalemakta meiner han dermed braut den omstridde tryggingslova som Kina innførte i Hongkong i 2020.

Brot på lova kan i dei mest alvorlege tilfella straffast med livsvarig fengsel.

Omdiskutert lov

Det er sett opp eit rettsmøte om skuldspørsmålet og straffeutmåling den 2. september, ifølgje Euronews. Wong er allereie dømt til ei fengselsstraff på fire år og åtte månader etter å ha erklært seg skuldig i ei anna sak knytt til den same tryggingslova i 2024. Ifølgje Hong Kong Free Press er han venta å erkjenne skuld også i denne saka.

Tryggingslova frå 2020 blir av kinesiske styresmakter omtalt som nødvendig for å sikre stabilitet. Kritikarar meiner derimot at ho blir brukt til å slå ned på politisk opposisjon og til å svekke ytringsfridomen.

Leia elevprotestar

Wong vart verdskjend som tenåring då han i 2012 leia elevprotestar mot innføringa av pro-kinesiske skulebøker. To år seinare vart han ein av frontfigurane i Paraplyrørsla, der hundretusenvis demonstrerte for friare val og meir demokrati i Hongkong.

Hongkong var britisk fram til 1997, då territoriet vart overført til Kina. Byen skulle framleis ha stor grad av sjølvstyre etter prinsippet «eitt land, to system», men mange innbyggjarar og internasjonale menneskerettsorganisasjonar meiner Beijing dei siste åra har stramma grepet om byen.