Norske studentar kan snart dra gratis på utveksling til Storbritannia

Det betyr at norske studentar, lærlingar og lærarar igjen kan studere og jobbe i Storbritannia gjennom programmet, utan å betale skulepengar, skriv Uniforum.

– Det er veldig bra at Storbritannia no blir med i Erasmus+-programmet igjen, seier forskings- og høgare utdanningsminister Sigrun Aasland (Ap) i ei pressemelding.

Tysdag underteikna ho og Storbritannias kompetanseminister Jaqueline Jill Smith ein intensjonsavtale om tettare utdanningssamarbeid.

Storbritannia er eitt av dei prioriterte landa for høgare utdanningssamarbeid.

– Storbritannia er ein viktig strategisk partnar for Noreg, også innan kunnskap og teknologi. Når vi saman skal byggje framtidas konkurransekraft og tryggleik treng vi meir studentutveksling. Det styrkjer vi no, seier Aasland.

Storbritannia gjekk ut av EU i 2020 og tredde ut av Erasmus+-programmet frå 2021.