Storbritannia innfører livslangt røykeforbod for alle under 18 år
Ein historisk lov gjer sigarettar ulovleg for alle Briter fødde etter 2008.
Det vart klart etter at det britiske parlamentet onsdag vedtok den nye Tobacco and Vapes-lova. Den hevar aldersgrensa for å kjøpa tobakk med eitt år kvart år. Lova gjeld frå og med personar fødde 1. januar 2009 eller seinare.
Storbritannias helseminister Wes Streeting kallar lova ein historisk augneblink for folkehelsa:
– Barn i Storbritannia vil vera ein del av den første røykfrie generasjonen, verna mot eit liv med avhengnad og skade. Det er betre å førebyggja enn å kurera.
Lova strammar også inn reglane stort for e-sigarettar og nikotin. Mellom anna får ikkje personar under 18 år lenger lov til å kjøpa slike produkt. I tillegg blir det forbod mot reklame, utstilling i butikkar og gratis utdeling.
Regjeringa meiner tiltaka vil hindra unge frå å bli avhengige av nikotin. Det vil også letta presset på helsevesenet på lang sikt, påpeikar dei.
Røyking forårsakar rundt 64.000 dødsfall og 400.000 sjukehusinnleggingar i året i England, ifølgje tal frå det statlege helsevesenet i Storbritannia (NHS). Røykinga kostar helsevesenet 3 milliardar pund årleg, medan dei totale samfunnskostnadene er estimerte til å overstiga 20 milliardar pund.
Det svarer høvesvis til 38 og vel 253 milliardar norske kroner etter dagens kurs.
