Nyhende- og debattavisa for unge
Saman har land rundt om i verda nådd eit viktig mål. No er nemleg over ti prosent av havområda på jorda verna.
Denne saka vart først publisert av systeravisa vår, Framtida Junior.
No har 5 millionar kvadratkilometer av verdshava – eit område som er større enn Norden – fått status som verna, informerer Verdas naturvernorganisasjon (IUCN).
At eit havområde er verna, vil seie at området er beskytta mot inngrep i framtida. Dette gjeld inngrep som ulike typar fiske, utslepp og utbygging av til dømes oljeplattformer.
I Noreg er 4,6 prosent av havområda verna på denne måten, ifølgje tal frå Statistisk sentralbyrå (SSB).
– Vi er alle avhengige av havet for å overleve. Over halvparten av oksygenet i verda blir produsert av liv i havet seier, seier Neville Ash i FN.
Han meiner det er grunn til å feire at over 10 prosent av havområde i verda no er verna, men peiker på at det må jobbast vidare for å verne meir.
Verdas naturvernorganisasjon har nemleg som mål å verne 30 prosent av verdas havområde innan 2030.
